පාකිස්ථාන එක්දින කණ්ඩායමේ නායකයා ලෙස මොහොමඩ් රිස්වාන්ගෙන් හිස් වූ තනතුරට නව පත්වීමක් සිදු කර තිබේ. ඒ අනුව, පාකිස්ථාන වේග පන්දු යවන ක්‍රීඩක ශහීන් අෆ්රිඩි නව එක්දින නායකයා ලෙස පත් කර ඇති බව පාකිස්ථාන ක්‍රිකට් මණ්ඩලය (PCB) සඳුදා (ඔක්තෝබර් 20) නිවේදනයක් නිකුත් කරමින් ප්‍රකාශ කළේය.වයස අවුරුදු 25ක් වන වමත් වේග පන්දු යවන්නා, නොවැම්බර් 4 වැනිදා ආරම්භ වන තරග තුනකින් යුත් එක්දින තරගාවලියකදී දකුණු අප්‍රිකාවට එරෙහිව සිය නව නායකත්වයේ පළමු අභියෝගයට මුහුණ දෙනු ඇත. 2018 දී ජාත්‍යන්තරයට පිවිසි ඔහු, එක්දින තරග 66කදී කඩුලු 131ක් දවාගෙන ඇති අතර, ලොව ප්‍රමුඛතම වේග පන්දු යවන්නෙකු ලෙස තම ස්ථානය තහවුරු කර ගෙන සිටී. ශහීන් මීට පෙර 2024 මුල් භාගයේදී නවසීලන්තයට එරෙහිව පැවති විස්සයි-විස්ස තරගාවලියකදී පාකිස්ථාන කණ්ඩායමට නායකත්වය දී ඇත. නායකත්වයෙන් රිස්වාන් ඉවත් කර ශහීන් අෆ්රිඩි පත් කිරීමේ තීරණය ගෙන ඇත්තේ වයිට්-බෝල් ප්‍රධාන පුහුණුකරු මයික් හෙසන්, උසස් ක්‍රියාකාරිත්වයේ අධ්‍යක්ෂ අකිබ් ජාවේඩ් සහ ජාතික තේරීම් කමිටු සාමාජිකයින්ගේ සහභාගීත්වයෙන් ඉස්ලාමාබාද්හි පැවති රැස්වීමකින් පසුවය. මොහොමඩ් රිස්වාන් 2024 ඔක්තෝබර් මාසයේදී පාකිස්ථානයේ වයිට්-බෝල් නායකත්වය භාරගත් අතර, ඔහු යටතේ පාකිස්ථානය වසර 22කට පසු ඕස්ට්‍රේලියාවේදී පළමු එක්දින ජයග්‍රහණය වාර්තා කරමින් ඓතිහාසික සාර්ථකත්වයක් අත්කර ගත්තේය.කෙසේ වෙතත්, 2025 මුල් භාගයේදී නවසීලන්තය සමග දේශීය තරගාවලි පරාජයකට මුහුණ දීමෙන් පාකිස්ථානය පසුබෑමකට ලක් වූ අතර, පසුව පැවති 2025 ICC ශූරයින්ගේ කුසලානයේදී කණ්ඩායම කාණ්ඩ අදියරෙන් ඔබ්බට යාමට අසමත් විය. නවසීලන්තයේ පැවති ඊළඟ එක්දින තරගාවලියේදී 3-0ක පරාජයක් ලැබීමෙන් අරගලය තවදුරටත් උත්සන්න විය. රිස්වාන් නායකත්වය දැරූ අවසන් තරගාවලිය වූයේ බටහිර ඉන්දීය කොදෙව්වන්ට එරෙහි තරගාවලියයි. එහිදී පළමු තරගය ජයග්‍රහණය කළද, පාකිස්ථානය අවසානයේදී 2-1 කින් පරාජයට පත් විය. අවසන් තරගයේදී පාකිස්ථානයට ලකුණු 92කට දැවී යෑමට සිදුවීමත්, ලකුණු 202ක විශාල පරාජයක් ලැබීමත්, අවසානයේ රිස්වාන්ගේ නායකත්ව කාලය අවසන් කිරීමට හේතු විය.
පකිස්ථාන එක්දින නායකත්වයෙන් රිස්වාන් ඉවතට: ශහීන් අෆ්රිඩිට නව තනතුර!
