රජය විසින් පාර්ලිමේන්තු මන්ත්රීවරුන්ගේ විශ්රාම වැටුප් අහෝසි කිරීම සඳහා පනත් කෙටුම්පතක් ඉදිරිපත් කර ඇති නමුත්, රට පුරා සිටින ලක්ෂ සංඛ්යාත විශ්රාමිකයන් මුහුණ දෙන දැවෙන ප්රශ්න විසඳීමට රජය අපොහොසත් වී ඇති බව විපක්ෂ නායක සජිත් ප්රේමදාස මහතා අද පාර්ලිමේන්තුවේදී ප්රකාශ කළේය. ලෝකයේ බොහෝ ප්රජාතන්ත්රවාදී රටවල මහජන නියෝජිතයන්ට විශ්රාම වැටුප් හිමිවන බවත්, එමඟින් දූෂණය අවම කිරීමට සහ ඔවුන්ගේ සේවා කාලයෙන් පසු සමාජ ආරක්ෂණයක් සැලසීමට උපකාරී වන බවත් පෙන්වා දුන් ඒ මහතා, මන්ත්රීවරුන්ට විශ්රාම වැටුපක් හිමිවිය යුතු බව තමන් විශ්වාස කරන බව පැවසීය.විශ්රාමිකයන් 750,000කට ආසන්න පිරිසකට සහන සැලසීම පිළිබඳව රජය පැහැදිලි ස්ථාවරයක නොසිට මන්ත්රී විශ්රාම වැටුප් කපා හැරීමට පමණක් අවධානය යොමු කරන්නේ මන්දැයි විපක්ෂ නායකවරයා මෙහිදී ප්රශ්න කළේය. විශේෂයෙන්ම 2025-2027 වසර සඳහා ප්රකාශයට පත් කළ වැටුප් වැඩිවීම් හමුවේ, 2020 සහ 2024 අතර විශ්රාම ගිය රාජ්ය සේවකයින් 154,000කට පමණ නිසි වැටුප් විෂමතා සංශෝධන මෙතෙක් ලැබී නොමැති බව ඔහු පෙන්වා දුන්නේය. විවිධ කමිටු නිර්දේශ හරහා ඇති වූ විෂමතා හේතුවෙන් බොහෝ විශ්රාමිකයන්ට හිමිවිය යුතු ප්රතිලාභ අහිමි වී ඇති බවත්, විශ්රාම වැටුප් අනියතභාවයන් තවමත් නොවිසඳී පවතින බවත් ඔහු චෝදනා කළේය.මීට අමතරව, ජ්යෙෂ්ඨ පුරවැසියන්ගේ ඉතුරුම් සඳහා මීට පෙර ලබා දුන් පොලී සහන කපා හැර ඇති බවත්, පොරොන්දු වූ පරිදි විදුලි ගාස්තු අඩු කිරීම් ක්රියාත්මක කර නොමැති බවත් ප්රේමදාස මහතා වැඩිදුරටත් සඳහන් කළේය. විපක්ෂ නායකවරයා මේ බව කියා සිටියේ අද පාර්ලිමේන්තුවේ පැවැති විවාදයකට එක්වෙමිනි.
පාර්ලිමේන්තු මන්ත්රී විශ්රාම වැටුප අහෝසියට සජිත්ගෙන් විරෝධය: ලක්ෂ සංඛ්යාත විශ්රාමිකයන්ගේ ගැටලුවලට විසඳුම් කෝ?
