මෑතකදී පැවති අධ්‍යාපනය පිළිබඳ ආංශික අධීක්ෂණ කාරක සභා රැස්වීමකදී, පුද්ගලික විශ්වවිද්‍යාල සහ අනෙකුත් උපාධි ප්‍රදානය කරන ආයතන නියාමනය කිරීම හා අධීක්ෂණය කිරීම සඳහා උසස් අධ්‍යාපන කොමිෂන් සභාවක් පිහිටුවීමේ අවශ්‍යතාව මතු විය. පසුගිය නොවැම්බර් 21 වැනිදා පාර්ලිමේන්තු මන්ත්‍රී හේෂා විතානගේ මහතාගේ සභාපතිත්වයෙන් පැවති සාකච්ඡාවකදී, ශ්‍රී ලංකාවේ පුද්ගලික විශ්වවිද්‍යාලවල ක්‍රියාකාරිත්වය සහ විශ්වවිද්‍යාල ප්‍රතිපාදන කොමිෂන් සභාවේ (UGC) පිළිගැනීමට අදාළ ගැටලු පිළිබඳව කාරක සභාව විසින් පරීක්ෂා කර තිබේ. මෙහිදී අදහස් දැක්වූ කාරක සභාවේ සභාපතිවරයා, ප්‍රමාණවත් නොවන ගුණාත්මකභාවයකින් යුත් උපාධි ප්‍රදානය කරන ආයතන මතුවීම සහ එමඟින් සිදුවන හානිය අවධාරණය කළේය. එවැනි ආයතන බොහොමයක් ගුණාත්මක අධ්‍යාපනයක් ලබා දෙනවාට වඩා ලාභ ලැබීම ප්‍රධාන අරමුණ කරගෙන ක්‍රියාත්මක වන බව ඔහු පෙන්වා දුන්නේය. ශිෂ්‍ය ඇතුළත් කිරීමේ සිට උපාධි ප්‍රදානය කිරීම දක්වා සමස්ත ක්‍රියාවලියම UGC අධීක්ෂණය යටතේ පැවතීමේ වැදගත්කම සභාපතිවරයා අවධාරණය කළේය. අදහස් දැක්වූ UGC උප සභාපතිවරයා, පුද්ගලික විශ්වවිද්‍යාල සහ අනෙකුත් උපාධි ප්‍රදානය කරන ආයතන නියාමනය කිරීම හා අධීක්ෂණය කිරීම සඳහා උසස් අධ්‍යාපන කොමිෂන් සභාවක් පිහිටුවීමේ අවශ්‍යතාව තවදුරටත් අවධාරණය කළේය. එවැනි ආයතනයක් මගින් විස්තීර්ණ දත්ත පද්ධති නිර්මාණය කිරීමට සහ ලොව පුරා ඇති විශ්වවිද්‍යාල සමඟ සබඳතා ඇති කර ගැනීමට හැකි වන බවත්, එමඟින් ආයතනික ප්‍රමිතීන් සහ වැඩසටහන්වල ගුණාත්මකභාවය පිළිබඳ අත්‍යවශ්‍ය තොරතුරු ලබා ගැනීමට ඉඩ සලසන බවත් ඔහු පැහැදිලි කළේය. අනාගත පුද්ගලික විශ්වවිද්‍යාල අනුමත කිරීමේදී නිවැරදි තීරණ ගැනීම සහතික කිරීමට මෙය උපකාරී වනු ඇති බව ඔහු සඳහන් කළේය. අධ්‍යාපන, උසස් අධ්‍යාපන සහ වෘත්තීය පුහුණු අමාත්‍යාංශයේ (රාජ්‍ය නොවන උසස් අධ්‍යාපන) අතිරේක ලේකම්වරයා සහ UGC නිලධාරීන් විසින් මෙම අදහස් තවදුරටත් ස්ථිර කරන ලදී. රාජ්‍ය විශ්වවිද්‍යාලවලට අදාළ ගැටලු, විදේශ උපාධි වැඩසටහන් සඳහා පිරිනමන ශිෂ්‍යත්ව සහ වෙනත් අදාළ කරුණු පිළිබඳවද කාරක සභාව මෙහිදී අවධානය යොමු කළේය.
පුද්ගලික විශ්වවිද්‍යාල නියාමනයට උසස් අධ්‍යාපන කොමිෂන් සභාවක් පිහිටුවීමේ අවශ්‍යතාව!
