බංග්ලාදේශ නව රජයේ දිවුරුම් දීමට ඇමති නලින්ද ජයතිස්ස සහභාගී වෙයි

බංග්ලාදේශයේ අභිනවයෙන් තේරී පත් වූ රජයේ දිවුරුම් දීමේ උත්සවය සඳහා ශ්‍රී ලංකා රජය නියෝජනය කරමින් සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා සහභාගී වන බව නිල වශයෙන් තහවුරු කර ඇත. තාරික් රහ්මාන්ගේ නායකත්වයෙන් යුත් මෙම නව රජයේ දිවුරුම් දීමේ උත්සවය පෙබරවාරි 17 වනදා ඩකා නුවර පිහිටි ජාතික පාර්ලිමේන්තු සංකීර්ණයේ දකුණු ප්ලාසා පරිශ්‍රයේදී පැවැත්වීමට නියමිත අතර, ඒ සඳහා දෙස් විදෙස් අමුත්තන් 1,200ක් පමණ සහභාගී වනු ඇතැයි අපේක්ෂා කෙරේ.​බංග්ලාදේශයේ ශ්‍රී ලංකා මහකොමසාරිස් ධර්මපාල වීරක්කොඩි මහතා ප්‍රකාශ කළේ, අමාත්‍යවරයාගේ මෙම සහභාගීත්වය හරහා ශ්‍රී ලංකාව සහ බංග්ලාදේශය අතර පවතින රාජ්‍යතාන්ත්‍රික සබඳතාව සහ සුහදශීලී බව මැනවින් පිළිබිඹු වන බවයි. බංග්ලාදේශ ජාතිකවාදී පක්ෂය (BNP) 13 වැනි පාර්ලිමේන්තු මැතිවරණයෙන් ලැබූ විශිෂ්ට ජයග්‍රහණයෙන් පසු තාරික් රහ්මාන් නව රජය මෙහෙයවීම සඳහා ජනවරම ලබා ගත්තේය. මෙම අවස්ථාවට ඉන්දියාව, භූතානය, පකිස්ථානය, නේපාලය සහ මාලදිවයින ඇතුළු රටවල් 13ක පමණ කලාපීය නායකයින් සහ නියෝජිතයින් පිරිසක් ද සහභාගී වීමට නියමිතය.