ලෝකය තනි පාලනයකට නතු කරගැනීමේ ආත්මාර්ථකාමී ආශාව හේතුවෙන් වත්මන් ලෝක සාමය බිඳ වැටී ඇති අතර, එය සමස්ත මනුෂ්ය වර්ගයාම මහත් පීඩාවකට පත් කර ඇති බව අගරදගුරු අති උතුම් මැල්කම් කාදිනල් රංජිත් හිමිපාණන් පවසති. පාස්කු ඉරිදා ප්රධාන දේව මෙහෙයට එක්වෙමින් උන්වහන්සේ අවධාරණය කළේ, එක් පුද්ගලයෙකුගේ බල ලෝභීත්වය මුළු මහත් මානව සංහතියටම වේදනාවක් ගෙන දී ඇති බවයි.නියම ක්රිස්තු ධර්මය යනු හුදෙක් යාඥා කිරීම හෝ බයිබල් පාඨ කියවීම පමණක් නොවන බව පෙන්වා දුන් කාදිනල් හිමිපාණන්, එය ප්රේමය හා කැපවීම මත පදනම් වූ ජීවන රටාවක් විය යුතු බව ප්රකාශ කළහ. විශේෂයෙන්ම වත්මන් ලෝක දේශපාලනය තුළ නායකයන් සේවකයන් වනු වෙනුවට බලය පසුපස හඹායන පාලකයන් බවට පත්වීම කණගාටුවට කරුණක් බව උන්වහන්සේ මෙහිදී පෙන්වා දුන්හ.ලෝකයේ පවතින මෙම අස්ථාවර සහ දුෂ්කර ගමන් මාර්ගයෙන් මිදී සාමය උදාකර ගැනීම උදෙසා සියලු දෙනා එක්ව යාඥා කළ යුතු බව උන්වහන්සේ මෙහිදී සිහිපත් කළහ. පාලකයන්ගේ සිත් වෙනස් වී ඔවුන් තුළ මානුෂීය හැඟීම් ජනිත කරවීම මෙම අවධියේ අත්යවශ්ය කරුණක් බව දේව මෙහෙය අතරතුර අදහස් දක්වමින් අගරදගුරුතුමන් වැඩිදුරටත් පැවසූහ.කිතු දහම තුළ නායකත්වය යනු සේවය කිරීම වුවද, වර්තමාන ලෝකය පාලනය කරන්නන් එම මූලධර්මයෙන් බැහැරව කටයුතු කරන බව කාදිනල් හිමිපාණන්ගේ විවේචනයට ලක් විය. දෙවියන් වහන්සේ සහ අසල්වැසියා ඉදිරියේ නිවැරදි වෙමින්, ප්රේමය පෙරදැරි කරගත් සැබෑ ආගමික මාවතකට අවතීර්ණ වීමේ වැදගත්කම උන්වහන්සේ මෙම විශේෂ දේශනයේදී අවධාරණය කළහ.
බලලෝභී පාලනය ලෝක සාමයට තර්ජනයක්: කාදිනල් හිමිපාණන්ගෙන් ප්රබල පණිවුඩයක්
