බස්නාහිර පළාතේ අපද්‍රව්‍ය කළමනාකරණය සඳහා පත් කරන ලද විශේෂ අනු කමිටුව විසින්, නිවාස, වීදි, ආයතන සහ ව්‍යාපාර හරහා ජනනය වන නාගරික ඝන අපද්‍රව්‍ය කළමනාකරණයේ වත්මන් තත්ත්වය, පවතින අභියෝග සහ ඉදිරි මඟ පිළිබඳව සාකච්ඡා පවත්වා තිබේ. අග්‍රාමාත්‍ය කාර්යාලය පැවසුවේ, අග්‍රාමාත්‍ය හරිනි අමරසූරිය මහත්මියගේ සහභාගීත්වයෙන් මෙම සතියේ (19) පාර්ලිමේන්තුවේදී මෙම අනු කමිටුව රැස් වූ බවයි. පළාත් පාලන ආයතනවල අපද්‍රව්‍ය කළමනාකරණය සඳහා නම් කරන ලද, කැපවූ සහ දැනුමැති නිලධාරීන් නොමැති වීම, අපද්‍රව්‍ය කළමනාකරණය සඳහා සුදුසු ඉඩම් සහ යටිතල පහසුකම් හිඟ වීම වැනි ගැටලු මෙන්ම ඒවාට විසඳුම් ලබා දීම සම්බන්ධයෙන් ද මෙහිදී පුළුල් සාකච්ඡා පැවැත්විණි. සාකච්ඡාවට අදහස් දක්වමින් අග්‍රාමාත්‍යවරිය අවධාරණය කළේ, ප්‍රජා ශක්ති සහ පිරිසිදු ශ්‍රී ලංකාව වැනි වැඩසටහන් හරහා ප්‍රගතියක් ලබාගත හැකි බව පෙන්වා දෙමින්, ප්‍රජා සහ පාසල් මට්ටමින් අපද්‍රව්‍ය කළමනාකරණය පිළිබඳ නිසි දැනුවත්භාවයක් ඇති කිරීමේ වැදගත්කමයි. තවද, වෘත්තීය අධ්‍යාපන අංශය සමඟ එක්ව අපද්‍රව්‍ය කළමනාකරණය නව වෘත්තීය විෂයයක් ලෙස හඳුන්වා දීමෙන් මහජනතාව දැනුවත් කිරීමට සහ වෘත්තීය මාර්ග නිර්මාණය කිරීමට උපකාරී වනු ඇති බව අගමැති අමරසූරිය මහත්මිය වැඩිදුරටත් සඳහන් කළාය. නාගරික සංවර්ධන නියෝජ්‍ය අමාත්‍ය එරංග ගුණසේකර, පාර්ලිමේන්තු මන්ත්‍රී සහ කොළඹ දිස්ත්‍රික් සම්බන්ධීකරණ කමිටු සභාපති ලක්ෂ්මන් නිපුනආරච්චි, පාර්ලිමේන්තු මන්ත්‍රී සහ රාජ්‍ය පරිපාලන, ස්වදේශ කටයුතු, පළාත් සභා සහ පළාත් පාලන අමාත්‍යාංශයේ උපදේශක සභාපති චන්දන සූරියආරච්චි, අග්‍රාමාත්‍ය ලේකම් ප්‍රදීප් සපුතන්ත්‍රි, කොළඹ දිස්ත්‍රික් ලේකම් ගිනිගේ ප්‍රසන්න ජනක කුමාර, දිස්ත්‍රික් ලේකම් කාර්යාලයේ නිලධාරීන්, මධ්‍යම පරිසර අධිකාරියේ නිලධාරීන් සහ නාගරික සංවර්ධන අධිකාරියේ නිලධාරීන් මෙම සාකච්ඡාවට සහභාගී වූහ.
බස්නාහිර පළාතේ කසළ කළමනාකරණයට විශේෂ සාකච්ඡාවක්: අග්‍රාමාත්‍යවරියත් සහභාගී වෙයි!
