රාත්‍රී කාලයේ බස් රථවල ගමන් ගන්නා මගීන්ගේ රන් භාණ්ඩ ඇතුළු වටිනා භාණ්ඩ සොරාගන්නා කාන්තාවන් කල්ලියක් කන්තලේ පොලිසිය විසින් අත්අඩංගුවට ගෙන තිබෙනවා.
බස් රථයක ගමන් ගත් මගී කාන්තාවක් විසින් සිදුකළ පැමිණිල්ලකට අනුව කාන්තාවන් සිව්දෙනෙක් අද (18) උදෑසන මෙලෙස මෙලෙස අත්අඩංගුවට ගෙන ඇති බවයි වාර්තා වුණේ.
හම්බන්තොට සිට ත්‍රිකුණාමලය බලා ධාවනය වූ රාත්‍රී බස් රථයක සිටි කාන්තාවකගේ රුපියල් ලක්ෂ දහයකට වඩා වටිනාකමකින් යුත් රන් භාණ්ඩ නැති වූ ඇති බවට ඇය විසින් කන්තලේ පොලිසියට පැමිණිල්ලක් කර තිබෙනවා.
බස් රථයේ දී තමන් ළඟින් වාඩි වූ තවත් කාන්තාවක් විසින් තමන්ට නිද්ද ගිය පසු තම ගමන් මල්ලේ තිබූ රත්තරන් බඩු සොරාගෙන ඇති බවයි එම කාන්තාව පොලිසිය පවසා ඇත්තේ.
රණ භාණ්ඩ සොරාගත් කාන්තාව සමඟ තවත් කාන්තාවන් තිදෙනක් කන්තලේ නගරයෙන් බැස ඇති බවට කරුණු අනාවරණය වී ඇති අතර, ඒ අනුව පොලිස් ජංගම රථ යොදා සිදුකළ සෝදිසියක දී ඔවුන් සිව්දෙනා අත්අඩංගුවට ගැනීමට හැකිව තිබෙනවා.
මෙලෙස අත්අඩංගුවට ගැනුණු කාන්තාවන් අවුරුදු 21, 23, 30 සහ 40 යන වයස් සීමාවල පසුවන තැනැතියන් වන අතර ඔවුන් පුත්තලම ප්‍රදේශයේ පදිංචිකාරිනියන් බවටයි හඳුනාගෙන ඇත්තේ.
මොවුන් විසින් දුරගමන් බස් රථවලට නැඟ ඒවායේ ගමන් ගන්නා මගීන්ගේ වටිනා භාණ්ඩ සොරකම් කිරීම වෘත්තියක් ලෙස කලක සිට සිදුකරගෙන ගොස් ඇති බවට අනවරණය වී තිබෙනවා.
අත්අඩංගුවට ගැනුණු සැකකාරියන් අද (18) දින කන්තලේ මහේස්ත්‍රාත් අධිකරණයට ඉදිරිපත් කිරීමට නියමිතව තිබුණා.
