එරට සෞඛ්‍ය අමාත්‍යාංශය ප්‍රකාශ කළේ, 2007 ජනවාරි මාසයෙන් පසු උපත ලැබූ ඕනෑම අයෙකු සඳහා දුම්පානය තහනම් කරමින් මාලදිවයින විසින් නීතිය ක්‍රියාත්මක කිරීමට පටන් ගත් බවයි. මෙය, පරම්පරාගතව දුම්කොළ තහනමක් ක්‍රියාත්මක කළ එකම රට ලෙස මාලදිවයින සනිටුහන් කරයි.ජනාධිපති මොහොමඩ් මුයිෂු මහතා විසින් මේ වසර මුලදී ආරම්භ කරන ලද මෙම පියවර නොවැම්බර් 1 වන දින සිට ක්‍රියාත්මක විය. සෞඛ්‍ය අමාත්‍යාංශය පැවසුවේ මෙය “මහජන සෞඛ්‍ය ආරක්ෂා කිරීමට සහ දුම්කොළවලින් තොර පරම්පරාවක් ප්‍රවර්ධනය කිරීමට” හේතු වනු ඇති බවයි.”නව විධිවිධානය යටතේ, 2007 ජනවාරි 1 වන දින හෝ ඊට පසුව උපත ලැබූ පුද්ගලයින්ට මාලදිවයින තුළ දුම්කොළ නිෂ්පාදන මිලදී ගැනීම, භාවිතය හෝ ඔවුන්ට අලෙවි කිරීම තහනම්ය,” යනුවෙන් අමාත්‍යාංශය වැඩිදුරටත් සඳහන් කළේය.”මෙම තහනම දුම්කොළවල සියලුම ආකාර සඳහා අදාළ වන අතර, සිල්ලර වෙළෙන්දන් අලෙවි කිරීමට පෙර වයස තහවුරු කළ යුතුය.”ලොව සුපිරි සංචාරක ගමනාන්තයක් ලෙස ප්‍රසිද්ධ, සමකයට හරස්ව කිලෝමීටර් 800ක් පමණ විහිදී ඇති කුඩා කොරල් දූපත් 1,191කින් සමන්විත මෙම රාජ්‍යයට පැමිණෙන අමුත්තන්ටද මෙම නීතිය අදාළ වේ.සෞඛ්‍ය අමාත්‍යාංශය පැවසුවේ, වයස් භේදයකින් තොරව සියලුම පුද්ගලයින් සඳහා විද්‍යුත් සිගරට් සහ වේපිං (Vaping) නිෂ්පාදන ආනයනය, විකිණීම, බෙදා හැරීම, සන්තකයේ තබා ගැනීම සහ භාවිතය සම්බන්ධයෙන්ද පුළුල් තහනමක් පවත්වාගෙන යන බවයි.බාලවයස්කරුවෙකුට දුම්කොළ නිෂ්පාදන අලෙවි කිරීම රුෆියා 50,000 ක (දළ වශයෙන් ඩොලර් 3,200) දඩයක් දක්වා ද, වේපිං උපකරණ භාවිතා කිරීම රුෆියා 5,000 ක (දළ වශයෙන් ඩොලර් 320) දඩයක් දක්වා ද දඬුවම් ලැබිය හැකිය.එක්සත් රාජධානියේ ද මෙවැනිම පරම්පරාගත තහනමක් යෝජනා වී ඇති නමුත් එය තවමත් ව්‍යවස්ථාදායක ක්‍රියාවලිය යටතේ පවතී. කෙසේ වෙතත්, දුම්පානයට එරෙහිව මෙවැනි නීතියක් මුලින්ම සම්මත කළ රට වන නවසීලන්තය, එය හඳුන්වා දී වසරකටත් අඩු කාලයකදී, 2023 නොවැම්බර් මාසයේදී එය අහෝසි කරන ලදී.
මාලදිවයිනෙන් ඓතිහාසික තීරණයක්! – 2007 න් පසු උපන් අයට දුම්පානය සම්පූර්ණයෙන් තහනම්
