මැදපෙරදිග කලාපයේ පවතින උණුසුම් යුදමය වාතාවරණය හේතුවෙන් ශ්රී ලංකාවට පැමිණීමට නියමිතව තිබූ ගුවන් වාර 768ක් පමණ මේ වනවිට අවලංගු වී ඇති බව සංචාරක කටයුතු නියෝජ්ය අමාත්ය රුවන් රණසිංහ මහතා අනාවරණය කරයි. මෙම තත්ත්වය මත දිවයිනට පැමිණෙන සංචාරකයින්ගේ සංඛ්යාව 30%ක පමණ ප්රමාණයකින් පහත වැටී ඇති බව පෙන්වා දෙන අමාත්යවරයා, සංචාරක ව්යාපාරය යළි නගාසිටුවීම සඳහා මත්තල ගුවන්තොටුපොළ කේන්ද්ර කරගනිමින් විශේෂ සංවර්ධන සැලසුම් සකස් කර ඇති බවද සඳහන් කළේය.සංචාරක ක්ෂේත්රයට පමණක් නොව, මෙරට අපනයන ආර්ථිකයට ද මෙම අර්බුදය සෘජු බලපෑම් එල්ල කර ඇති බව අපනයන සංවර්ධන මණ්ඩලය පෙන්වා දෙයි. ශ්රී ලංකාවේ සමස්ත අපනයනවලින් 8%ක් පමණ නියෝජනය කරන්නේ මැදපෙරදිග කලාපය බැවින්, එහි පවතින අස්ථාවරත්වය මෙරට විදේශ විනිමය ඉපයීම් කෙරෙහි අහිතකර ලෙස බලපාන බව එම මණ්ඩලයේ සභාපති මංගල විජේසිංහ මහතා ප්රකාශ කළේය.විශේෂයෙන්ම මෙරට තේ අපනයනය සම්බන්ධයෙන් ඉදිරියේදී ගැටලුකාරී තත්ත්වයක් මතුවිය හැකි බවට බලධාරීන් අනතුරු අඟවයි. වර්තමාන තත්ත්වය අනුව ශ්රී ලංකාවෙන් අපනයනය කරන මුළු තේ ප්රමාණයෙන් 35%ක්ම ගමනාන්තය වන්නේ ඉරානයයි. කලාපීය යුද ගැටුම් තවදුරටත් උත්සන්න වුවහොත්, එම තේ තොග සඳහා විකල්ප වෙළෙඳපොළවල් සොයා ගැනීමට දැනටමත් සාකච්ඡා ආරම්භ කර ඇති බව සභාපතිවරයා වැඩිදුරටත් පැවසීය.ගෝලීය දේශපාලනික අර්බුද හමුවේ මෙරට ආර්ථිකයට එල්ල වන මෙම අභියෝග ජය ගැනීම සඳහා රජය සහ අදාළ ආයතන ඒකාබද්ධ වැඩපිළිවෙලක් ක්රියාත්මක කිරීමට අපේක්ෂා කරයි. මැදපෙරදිග වෙළෙඳපොළ මත රඳා පවතින ක්ෂේත්ර සුරක්ෂිත කරගනිමින් නව වෙළෙඳ අවස්ථා දිනා ගැනීම කෙරෙහි මෙහිදී මූලික අවධානය යොමුව තිබේ.
මැදපෙරදිග අර්බුදය මෙරට සංචාරක සහ අපනයන ක්ෂේත්රවලට දැඩි බලපෑමක් එල්ල කරයි
