මැදපෙරදිග කලාපයේ පවතින නොසන්සුන්කාරී වාතාවරණය හමුවේ වුවද, ශ්රී ලංකාවට ලැබෙන විදේශ කම්කරු ප්රේෂණවල අඩුවීමක් දක්නට නොලැබෙන බව ශ්රී ලංකා මධ්යම බැංකු අධිපති ආචාර්ය නන්දලාල් වීරසිංහ මහතා ප්රකාශ කළේය. අද (25) පැවැති මාධ්ය හමුවකදී ඔහු කියා සිටියේ, පවතින දත්තයන්ට අනුව පසුගිය දින කිහිපය තුළ විදේශ ප්රේෂණවල සුළු වර්ධනයක් පවා නිරීක්ෂණය වී ඇති බවයි. එමෙන්ම යුදමය තත්ත්වය නිසා මැදපෙරදිග සිටින ශ්රී ලාංකිකයන් මෙරටට නැවත පැමිණීමේ ප්රවණතාවක් පිළිබඳවද මෙතෙක් වාර්තා වී නොමැති බව ඔහු වැඩිදුරටත් සඳහන් කළේය.කෙසේ වෙතත්, මෙම අර්බුදය මෙරට සංචාරක ක්ෂේත්රයට සෘජු බලපෑමක් එල්ල කර ඇති බව අධිපතිවරයා පිළිගත්තේය. මැදපෙරදිග පවතින අස්ථාවර තත්ත්වය හේතුවෙන් මෙරටට පැමිණෙන සංචාරකයින්ගේ සංඛ්යාව 17% කින් පමණ පහත වැටී ඇත. මේ අතර, ඊයේ (24) රැස්වූ මුදල් ප්රතිපත්ති මණ්ඩලය විසින් මෙරට ප්රතිපත්ති පොලී අනුපාතිකය (Overnight Policy Rate) 7.75% මට්ටමේ නොවෙනස්ව පවත්වා ගැනීමට තීරණය කර ඇත. ගෝලීය බලශක්ති මිල ඉහළ යාම සහ වෙළඳ බාධාවන් හමුවේ වුවද, මෙරට උද්ධමනය පාලනය කරමින් ආර්ථිකය ස්ථාවරව තබා ගැනීම මෙහි අරමුණයි.පසුගිය පෙබරවාරි මාසය වන විට ශ්රී ලංකාවේ උද්ධමනය 1.6% ක මට්ටමක පැවති අතර, එය 5% ක ඉලක්කගත මට්ටමකට වඩා අඩු අගයකි. එබැවින් බලශක්ති මිල ඉහළ යාමේ බලපෑම දරා ගැනීමට ආර්ථිකයට හැකියාව පවතින බව මධ්යම බැංකුව පවසයි. 2026 වසරේ දෙවන කාර්තුව වන විට උද්ධමනය 5% ඉලක්කය කරා ළඟා වනු ඇතැයි අපේක්ෂා කෙරේ. 2025 වසරේදී මෙරට ආර්ථිකය 5.0% ක ප්රබල වර්ධනයක් වාර්තා කළ අතර,සුළි කුණාටුවෙන් සිදු වූ බාධාවලින් පසු මේ වන විට ආර්ථිකය යථා තත්ත්වයට පත්වෙමින් පවතී.2026 පෙබරවාරි අවසානය වන විට මෙරට නිල සංචිත ප්රමාණය ඇමරිකානු ඩොලර් බිලියන 7.3 ක් දක්වා වර්ධනය වී තිබීම විශේෂත්වයකි. මැදපෙරදිග අර්බුදය නිසා බලශක්ති, වෙළඳ සහ සංචාරක යන අංශවලට අවදානමක් පවතින නමුත්, විදේශ විනිමය වෙළඳපොළෙන් ඩොලර් මිලදී ගැනීම හරහා සංචිත ශක්තිමත් කිරීමට මධ්යම බැංකුව පියවර ගෙන ඇත. කලාපීය අනෙකුත් රටවල මුදල් ඒකක මෙන්ම රුපියල කෙරෙහි ද යම් අවප්රමාණ වීමේ පීඩනයක් මතුව ඇති නමුත්, උද්ධමනය පාලනය කරමින් ආර්ථිකය ස්ථාවර කිරීමට අවශ්ය පියවර ගැනීමට සූදානම් බව මධ්යම බැංකුව අවධාරණය කරයි.
මැදපෙරදිග අර්බුදය හමුවේ වුවද විදේශ ප්රේෂණ ඉහළට
