මිද්දෙණිය ත්‍රිත්ව ඝාතනය සම්බන්ධයෙන් පොලිස් කොස්තාපල්වරයෙකු ඇතුළු තිදෙනෙකු අද (21) පෙරවරුවේ පොලීසිය විසින් සැකපිට අත්අඩංගුවට ගෙන ඇති බව වාර්තා වේ.
මිද්දෙණිය – කඩේවත්ත ප්‍රදේශයේ සිදු වූ සංවේදී ත්‍රිපුද්ගල ඝාතන සිද්ධියට සම්බන්ධ බවට සැක කෙරෙන පුද්ගලයින් තිදෙනෙකු අද (පෙබරවාරි 21) උදෑසන පොලිස් අත්අඩංගුවට පත්ව තිබේ. මෙම සිද්ධියට සම්බන්ධ බවට සැක කෙරෙන පුද්ගලයින් අතර ක්‍රියාන්විත සේවයේ නියුතු පොලිස් කොස්තාපල්වරයෙකුද සිටින බව මහජන ආරක්ෂක අමාත්‍ය ආනන්ද විජේපාල අද උදෑසන පාර්ලිමේන්තුවේදී හෙළි කළේය.
පොලිස් මාධ්‍ය ප්‍රකාශක වාර්තා කළ පරිදි අත්අඩංගුවට ගෙන ඇති සැකකරුවන් වන්නේ ජීවන් ප්‍රසාද් කුමාර, ප්‍රභාත් තුෂාර සහ පොලිස් කොස්තාපල් අයි.එල්. ජනක ප්‍රසාද් යන අය වේ. මෙම සැකකරුවන් තිදෙනා පිළිබඳ විමර්ශන කටයුතු දැනට සිදු කෙරෙමින් පවතියි.
පසුගිය පෙබරවාරි 18 වන දින රාත්‍රී 10.30ට පමණ ගල්පොත්තාවල ප්‍රදේශයේ පදිංචි අරුණ විදානගමගේ (39) නමැති පුද්ගලයා සිය දරුවන් දෙදෙනා සමඟ යතුරුපැදියකින් ගමන් කරමින් සිටියදී මෙම වෙඩි ප්‍රහාරයට ලක් විය.
මෙම වෙඩි තැබීමෙන් පියා සහ ඔහුගේ දියණිය හා පුත්‍රයා යන තිදෙනාම ඝාතනයට ලක් විය.
මහජන ආරක්ෂක අමාත්‍ය ආනන්ද විජේපාල අද පාර්ලිමේන්තු සභාවාරයේදී මෙම සිද්ධිය සම්බන්ධයෙන් විශේෂ ප්‍රකාශයක් සිදු කළේය. එහිදී අමාත්‍යවරයා සඳහන් කළේ මෙම සිද්ධියට සම්බන්ධ සැකකරුවන් තිදෙනා පොලිස් විමර්ශන අංශ විසින් හඳුනාගෙන අත්අඩංගුවට ගැනීමට සමත් වූ බවයි. විශේෂයෙන්ම මෙම සිද්ධියට ක්‍රියාන්විත රාජකාරියේ නියුතු පොලිස් නිලධාරියෙකු සම්බන්ධ වී සිටීම පිළිබඳව ද අමාත්‍යවරයා සිය කණගාටුව පළ කර ඇති බව වාර්තා වේ.
