මෙන්කැෆෙප් ආයතනයේ නිර්මාතෘවරුන්ට ගෝලීය මානුෂීය සම්මානයක්

ඉන්දියාවේ පැවති 2025 ‘වන් වර්ල්ඩ් වන් ෆැමිලි’ (One World One Family) මානුෂීය සම්මාන උළෙලේදී ‘මෙන්කැෆෙප්’ (MENCAFEP) ආයතනයේ සම නිර්මාතෘවරුන් වන ආචාර්ය ක්‍රිස්ටෝපර් එම්. ස්ටබ්ස් මහතා සහ රාජිනී ස්ටබ්ස් ස්වාමිනාදන් මහත්මිය ඇගයීමට ලක්ව ඇත. ලොව පුරා සහභාගී වූවන් 8,000කට අධික සංඛ්‍යාවක් එක්රැස් වූ මෙම ගෝලීය උත්සවයට ශ්‍රී ලංකාවෙන් ආරාධනා ලැබූ එකම නියෝජිතයන් වූයේ ඔවුන් දෙදෙනා වන අතර, මෙරට ආබාධිත ක්ෂේත්‍රය සඳහා වසර 40කට අධික සේවාවක් වෙනුවෙන් සෞඛ්‍ය සේවා අංශය යටතේ මෙම සම්මානය ඔවුන්ට හිමි විය. මෙම සම්මානය මගින් 1988 දී නුවරඑළියේ දරුවන් හය දෙනෙකුගෙන් ආරම්භ කර, මේ වන විට දරුවන් හා පවුල් 17,000කට අධික සංඛ්‍යාවකට සහය දක්වන මෙන්කැෆෙප් ආයතනය ශ්‍රී ලංකාව පුරා ආබාධිතභාවය ඇතුළත් කිරීම, ප්‍රජා මූලික සත්කාර සහ පවුල් සවිබල ගැන්වීම සඳහා ඉටු කළ කාර්යභාරය ඉස්මතු කරයි. ආචාර්ය සහ මහත්මිය ස්ටබ්ස් යුවළ පසුගිය සිකුරාදා (නොවැම්බර් 21) දිවයිනට පැමිණි අතර, එහිදී ඔවුන්ව සෙරන්ඩිබිටි එක්ස්පීරියන්සස් (Serendipity Experiences) සහ ශ්‍රී ලංකා ගුවන්තොටුපළ සහ ගුවන් සේවා ආයතනය විසින් උණුසුම් ලෙස පිළිගනු ලැබීය.