මෙරට තරුණ පරපුර දැඩි මානසික පීඩනයක

ශ්‍රී ලංකාවේ වයස අවුරුදු 10 ත් 24 ත් අතර තරුණ ප්‍රජාවෙන් 39% ක් පමණ මානසික ආතතියෙන් පෙළෙන බව ජාතික මානසික සෞඛ්‍ය විද්‍යායතනයේ අධ්‍යක්ෂ වෛද්‍ය ධම්මික අලහප්පෙරුම මහතා අනාවරණය කරයි. මුල්ලේරියාව ජාතික මානසික සෞඛ්‍ය විද්‍යායතනයේ සියවස සැමරීම වෙනුවෙන් පැවැති විශේෂ මාධ්‍ය හමුවකදී ඔහු පෙන්වා දුන්නේ මානසික රෝග මෙරට සියලුම වයස් කාණ්ඩවලට බලපාන වර්ධනය වෙමින් පවතින මහජන සෞඛ්‍ය ගැටලුවක් බවයි. සමස්ත ජනගහනයෙන් 13% ක් පමණ මානසික සෞඛ්‍ය ගැටලු අත්විඳින අතර, ඉන් 3% ක් එදිනෙදා ජීවිතයට බාධා පමුණුවන බරපතල තත්ත්වයන්ගෙන් පීඩා විඳිති. මීට අමතරව, ශ්‍රී ලාංකිකයන් පස් දෙනෙකුගෙන් එක් අයෙකු (19% ක්) විශාදය හෙවත් මානසික අවපීඩනයෙන් පෙළෙන බවත්, සියදිවි නසාගැනීම ජාතික මෙන්ම ගෝලීය වශයෙන් ප්‍රධාන ගැටලුවක් වී ඇති බවත් ඔහු සඳහන් කළේය.​විශේෂයෙන්ම නව යොවුන් වියේ පසුවන්නන් අතර මානසික සෞඛ්‍ය අභියෝග උග්‍ර වී ඇති අතර, තරුණ තරුණියන්ගෙන් 20% ක් හුදෙකලාව නිසා ඇතිවන පීඩනයෙන් ද, 18% ක් දිගුකාලීන විශාද ලක්ෂණවලින් ද පෙළෙන බව දත්ත මගින් හෙළි වේ. වඩාත් කණගාටුදායක තත්ත්වය වන්නේ තරුණ ප්‍රජාවෙන් 15% ක් පමණ සියදිවි නසාගැනීමට බැරෑරුම් ලෙස සිතා තිබීම සහ 10% ක් පමණ ඒ සඳහා උත්සාහ කර තිබීමයි. මෙහිදී තරුණියන් වැඩි වශයෙන් පීඩාවට පත්වන බව ද වෛද්‍යවරයා සඳහන් කළේය. මානසික යහපැවැත්ම ප්‍රවර්ධනය කිරීම, රෝගී තත්ත්වයන් කල්තියා හඳුනා ගැනීම සහ ප්‍රතිකාර සඳහා ඇති ප්‍රවේශය පහසු කිරීම මෙරට ජනතාවගේ මානසික සෞඛ්‍ය සුරක්ෂිත කිරීම සඳහා අත්‍යවශ්‍ය වේ. කෙසේ වෙතත්, විශේෂිත රෝහල් නවීකරණය කිරීම සහ ප්‍රාථමික සෞඛ්‍ය සේවාවන්ට මානසික සෞඛ්‍ය සේවා ඒකාබද්ධ කිරීම හරහා ශ්‍රී ලංකාව මේ වන විට යම් ප්‍රගතියක් අත්කර ගෙන ඇති බව ද හෙතෙම වැඩිදුරටත් පැවසීය.