ජාත්යන්තර කාන්තා දිනය නිමිත්තෙන් එක්සත් ජාතික පක්ෂය සංවිධානය කළ විශේෂ සැමරුම් උත්සවය මෙවර විරෝධතාවයක ස්වරූපයක් ගත්තේය. “බොරුව පරදවමු – සත්යය දිනවමු” යන තේමාව යටතේ පිටකෝට්ටේ සිරිකොත පක්ෂ මූලස්ථානයේදී පැවැත්වුණු මෙම වැඩසටහනේදී, සහභාගී වූ කාන්තාවන් කළු පටි පැළඳ පහන් දල්වමින් වර්තමාන රජයේ ක්රියාකලාපයට සිය අප්රසාදය පළ කළහ. පක්ෂ මහලේකම් තලතා අතුකෝරාල මහත්මියගේ ප්රධානත්වයෙන් පැවැති මෙම අවස්ථාවට නවීන් දිසානායක, වජිර අබේවර්ධන සහ අකිල විරාජ් කාරියවසම් ඇතුළු ජ්යෙෂ්ඨ නායකයන් පිරිසක් එක්ව සිටියහ.මෙහිදී අදහස් දැක්වූ මහලේකම් තලතා අතුකෝරාල මහත්මිය දැඩි ලෙස අවධාරණය කළේ, මෙරට කාන්තාවන් වෙනුවෙන් උපරිම සේවයක් ඉටු කළේ රනිල් වික්රමසිංහ මහතා බවයි. මෛත්රී වික්රමසිංහ මැතිණිය වැනි විද්වත් කාන්තාවන් අපරාධ පරීක්ෂණ දෙපාර්තමේන්තුව හමුවට කැඳවමින් රජය සිදුකරන දේශපාලන පලිගැනීම් උඩඟු ක්රියාවන් බව ඇය පෙන්වා දුන්නාය. කාන්තා අයිතීන් සුරැකීමට අපොහොසත් වී ඇති ආණ්ඩුවට ඒ පිළිබඳ කතා කිරීමට සදාචාරාත්මක අයිතියක් නොමැති බවත්, කාන්තා කොමිසමට සභාපතිවරයෙකු පත් කිරීමට රජය වහා පියවර ගත යුතු බවත් ඇය වැඩිදුරටත් සඳහන් කළාය.උත්සවයේ ප්රධාන දේශනය පවත්වමින් රෝසි සේනානායක මහත්මිය කාන්තා සවිබල ගැන්වීමේ වැදගත්කම පැහැදිලි කළ අතර, වෛද්ය තුසිතා විජේමාන්න මහත්මිය පෙන්වා දුන්නේ වත්මන් පාලනය යටතේ කාන්තාවන් වෙනුවෙන් කිසිදු සාධනීය පියවරක් ගෙන නොමැති බවයි. රනිල් වික්රමසිංහ මහතාගේ පාලන සමය තුළ ක්රියාත්මක වූ කාන්තා සුබසාධන වැඩපිළිවෙළවල් වර්තමානය වන විට අඩපණ වී ඇති බවට ද එහිදී විවේචන එල්ල විය.ශාන්තිනී කෝංගහගේ මහත්මිය සහ ප්රවීනා රවිරාජ් මහත්මිය ද මෙහිදී අදහස් දැක්වූ අතර, භාෂා ත්රිත්වයෙන්ම කාන්තා අයිතිවාසිකම් වෙනුවෙන් හඬ අවදි කිරීම විශේෂත්වයක් විය. කාන්තාවන් සමාජයීය වශයෙන් ශක්තිමත් කිරීමට නම් පවතින අසාධාරණ නීති සහ මර්දනකාරී දේශපාලන සංස්කෘතිය වෙනස් විය යුතු බව ඔවුන්ගේ අදහස විය. එක්සත් ජාතික පක්ෂයේ ශක්තිය කාන්තාවන් බවත්, ඔවුන්ගේ අයිතීන් උදෙසා පක්ෂය නිරන්තරයෙන් පෙනී සිටින බවත් මෙහිදී යළිත් තහවුරු කෙරිණි.උත්සවය ආරම්භයේදී දිවංගත පක්ෂ නායකයන්ගේ පිළිරුවලට පුෂ්පෝපහාර දැක්වීම සිදු වූ අතර, පක්ෂ මූලස්ථානය ඉදිරිපිට රැස්වූ කාන්තා නියෝජිතවරියන් රජයේ අත්තනෝමතික පාලනයට එරෙහිව සිය විරෝධය සනිටුහන් කළහ. කාන්තා පනත සවිබල ගන්වන ලෙස රජයට බල කරමින් අවසන් වූ මෙම සැමරුම, ඉදිරි දේශපාලන ගමන් මගෙහි කාන්තා නියෝජනය තීරණාත්මක සාධකයක් වන බවට ඉඟි පළ කළේය.
රජයේ මර්දනයට එරෙහිව සිරිකොත කළු පටිවලින් වැසෙයි: කාන්තා අයිතීන් වෙනුවෙන් එජාපයෙන් දැවැන්ත විරෝධයක්
