අග්‍රාමාත්‍ය ආරක්ෂක අංශයට අනුයුක්තව සේවය කරන කාන්තා පොලිස් කොස්තාපල්වරුන් දෙදෙනෙකු විසින් නාරාහේන්පිට තිඹිරිගස්යාය මාර්ගයේදී නැතිවී තිබූ මුදල් පසුම්බියක් එහි හිමිකාරිය වන විදේශීය සංචාරක කාන්තාවකට නැවත භාර දීමට කටයුතු කර තිබේ.පොලිසියට අනුව, 12093 පොලිස් කොට්ඨාසයේ සේවය කරන කාන්තා පොලිස් කොස්තාපල් යමුනා ධම්මිකා කුමාරි එදිරිසිංහ සහ කොස්තාපල් සමන්මලී යන මහත්මීන් විසින් ඔක්තෝබර් 23 වන දින මෙම මුදල් පසුම්බිය සොයාගෙන ඇත.නැතිවූ මුදල් පසුම්බියේ හිමිකාරිය ලෙස හඳුනාගෙන ඇති බ්‍රිතාන්‍ය ජාතික සබ්‍රිනා කැමරන් (Sabrina Cameron) මහත්මිය අග්‍රාමාත්‍ය ආරක්ෂක අංශය වෙත කැඳවා ඇති අතර, එම අංශයේ අධ්‍යක්ෂ, පොලිස් අධිකාරී සුමිත්‍රා ද සිල්වා මහතා විසින් මුදල් පසුම්බිය ඇයට භාර දී ඇත.මෙම මුදල් පසුම්බියෙහි රුපියල් 6,000 ක මුදලක්, ආසන්න වශයෙන් රුපියල් 600,000 කට අධික වටිනාකමකින් යුත් විදේශ මුදල් (යුරෝ, එක්සත් ජනපද ඩොලර්, බ්‍රිතාන්‍ය පවුම්), මෙන්ම දේශීය හා විදේශීය ක්‍රෙඩිට් කාඩ්පත්, ජාත්‍යන්තර රියදුරු බලපත්‍රයක්, ගමන් බලපත්‍රයක් සහ තවත් විදේශීය ලේඛන කිහිපයක් අඩංගු වී තිබුණි.
විදේශීය සංචාරක සබ්‍රිනාගේ ලක්ෂ 6ක් වටිනා මුදල් පසුම්බිය නැවත භාර දෙයි
