නවතම විගණන වාර්තාවකින් හෙළි වී ඇත්තේ, අමාත්‍යාංශ සහ දෙපාර්තමේන්තු ඇතුළු විවිධ රාජ්‍ය ආයතනවලට අයත් වාහන 73ක් නිල වශයෙන් පවරා ගැනීමකින් තොරව යුද හමුදාව විසින් භාවිත කරන බවයි.මෙම වාහන අතර ට්‍රැක්ටර්, ට්‍රේලර්, ගිලන් රථ, කැබ් රථ, ජීප් රථ, ඉන්ධන බවුසර්, බස් රථ සහ යතුරුපැදි ඇතුළත් වේ.මෙම වාහනවලින් 24ක් 2014 වසරේ සිට විගණනයට ලක්වන වසර දක්වා කාලය තුළදී ධාවනය කළ නොහැකි තත්ත්වයේ පැවති බවත්, ඒවා හමුදා පරිශ්‍රවල නවතා දමා තිබූ බවත් විගණනයේදී සටහන් විය.ඊට ප්‍රතිචාර දැක්වූ ගණකාධිකාරී නිලධාරීවරයා ප්‍රකාශ කළේ, අදාළ ආයතනවලින් අවශ්‍ය ලියකියවිලි ලබා ගැනීම සඳහා පියවර ගනිමින් සිටින බවත්, ඉන් පසු වාහන නිල වශයෙන් පවරා ගැනීම අවසන් කරන බවත්ය.නිසි වගවීම සහ කළමනාකරණය සහතික කිරීම සඳහා, යුද හමුදාව විසින් මෙම වාහන නිල වශයෙන් පවරා ගන්නා ලෙස හෝ අදාළ ආයතන වෙත ආපසු භාර දෙන ලෙස විගණනය නිර්දේශ කර ඇත.මේ අතර, විගණන වාර්තාවෙන් තවදුරටත් හෙළි වී ඇත්තේ, යුධ සමයේදී හමුදාව විසින් අත්පත් කරගත් වාහන 547 න් වාහන 454 කට රක්ෂණ ආවරණයක් නොතිබූ බවත්, වාහන 221 ක් 2024 වසරේදී කිසිදු කටයුත්තක් සඳහා භාවිත කර නොමැතිව හමුදා පරිශ්‍රය තුළ නවතා තිබූ බවත්ය.ඉතිරි වාහන සඳහා රක්ෂණ ආවරණය ලබා ගැනීමට පියවර ගනිමින් සිටින බව ගණකාධිකාරී නිලධාරීවරයා දැනුම් දී ඇත.විගණනය නිර්දේශ කර ඇත්තේ, ධාවනය වන සියලුම වාහන නිසි ලෙස රක්ෂණය කර ඇති බවට තහවුරු කිරීමටත්, දැනට ආවරණයක් නොමැති වාහන සම්බන්ධයෙන් අවශ්‍ය පියවර ගැනීමටත් යුද හමුදාව වහා පියවර ගත යුතු බවයි.
විවිධ ආයතනවල වාහන 73ක් යුද හමුදාව අතේ!
