සෞඛ්ය බලධාරීන් සමඟ පැවති සාකච්ඡා අසාර්ථක වීම හේතුවෙන් රජයේ වෛද්ය නිලධාරීන්ගේ සංගමය (GMOA) දැනට ක්රියාත්මක කරන වෘත්තීය ක්රියාමාර්ග එළැඹෙන පෙබරවාරි 02 වැනිදා සිට තවදුරටත් දැඩි කිරීමට තීරණය කර තිබේ. ඉල්ලීම් කිහිපයක් මුල් කරගනිමින් පසුගිය 26 වැනිදා ආරම්භ කළ මෙම අරගලය සම්බන්ධයෙන් අද (31) පෙරවරුවේ රැස්වූ එම සංගමයේ විධායක සභාව මෙම තීරණාත්මක පියවර ගෙන ඇත.ගැටලුවලට සාධනීය පිළිතුරු ලබා දීම සඳහා සෞඛ්ය අමාත්යවරයා වෙත ලබා දී තිබූ පැය 48ක සහන කාලය තුළ කිසිදු යහපත් ප්රතිචාරයක් නොලැබීම මෙම තීරණයට ප්රධාන හේතුව වී තිබේ. ඒ අනුව, මීට පෙර ලිහිල් මට්ටමින් පැවති වෘත්තීය ක්රියාමාර්ග ලබන සඳුදා උදෑසන 8.00 සිට වඩාත් තීව්ර ස්වරූපයකින් රට පුරා ක්රියාත්මක කිරීමට වෛද්යවරුන් සූදානම් වේ.මෙම නව ක්රියාමාර්ග යටතේ රෝහල් පද්ධතිය තුළ රෝගී සත්කාරක සේවාවන්හි යම් සීමා කිරීම් රැසක් සිදු වනු ඇත. විශේෂයෙන්ම, රෝහල් සතුව නොමැති ඖෂධ, වෛද්ය උපකරණ හෝ රසායනාගාර පරීක්ෂණ බාහිරින් ලබා ගැනීමට රෝගීන්ට නිර්දේශ නිකුත් කිරීමෙන් වෛද්යවරුන් ඉවත් වීමට නියමිතය. රජයේ රෝහල් තුළ පවතින දැඩි හිඟපාඩු පිළිබඳව වගකීම සෞඛ්ය පරිපාලනය විසින් භාරගත යුතු බව මෙයින් අවධාරණය කෙරේ.මීට අමතරව, දේශපාලන කණ්ඩායම් සංවිධානය කරන වෛද්ය කඳවුරුවලින් ඉවත් වීම සහ ප්රමාණවත් සහායක කාර්ය මණ්ඩලයක් නොමැතිව රෝගීන් පරීක්ෂා කිරීමෙන් වැළකී සිටීමට ද වෛද්යවරුන් තීරණය කර ඇත. තවද, අවශ්ය තරම් වෛද්යවරුන් අනුයුක්ත නොකර අලුතින් විවෘත කරන වාට්ටු සහ ඒකකවල රාජකාරී භාර ගැනීමෙන් බැහැර වන බව ද එම සංගමය පවසයි.විශේෂඥ වෛද්යවරුන් ද තමන්ට අදාළ රෝහලෙන් පරිබාහිරව වෙනත් රෝහල්වල සේවය ආවරණය කිරීමෙන් ඉවත් වීමට තීරණය කර ඇති බැවින්, මෙම වෘත්තීය ක්රියාමාර්ගය සෞඛ්ය සේවාවට දැඩි බලපෑමක් එල්ල කරනු ඇත. මෙම අර්බුදකාරී තත්ත්වය සමනය කිරීමට නම් බලධාරීන් වහාම මැදිහත් වී තම ඉල්ලීම්වලට විසඳුම් දිය යුතු බව රජයේ වෛද්ය නිලධාරීන්ගේ සංගමය අවධාරණය කරයි.
වෛද්යවරුන්ගේ අඛණ්ඩ වෘත්තීය ක්රියාමාර්ගය ලබන 02 දා සිට දැඩි වෙයි!
