ශ්‍රී ලංකා සංචාරක ක්ෂේත්‍රයේ නව ගමනාන්ත කරා විහිදීමක්!

Mastercard ආර්ථික විද්‍යා ආයතනයේ (Mastercard Economics Institute) 2026 ආර්ථික විවරණයට අනුව, ශ්‍රී ලංකාවේ පැමිණෙන සංචාරක කර්මාන්තය ව්‍යුහාත්මක වෙනසකට භාජනය වෙමින් පවතින අතර, සංචාරක වියදම් සාම්ප්‍රදායික නාගරික මධ්‍යස්ථානවලින් ඔබ්බට නැගී එන ගමනාන්ත කරා ගමන් කරමින් තිබේ. මෙම සොයාගැනීම් පිළිබඳව අදහස් දක්වමින් Mastercard හි ශ්‍රී ලංකාව සහ මාලදිවයින සඳහා වන රට කළමනාකරු සඳුන් හපුගොඩ මහතා පැවසුවේ, වසංගතයට පෙර පැවති 2019 මට්ටම් 2025 සමඟ සංසන්දනය කිරීමේදී සංචාරක රටාවල පැහැදිලි පරිණාමයක් දත්තවලින් පෙන්නුම් කරන බවයි. කොළඹ තවමත් සංචාරක කර්මාන්තයට අදාළ ගනුදෙනු ප්‍රමාණයෙන් හතරෙන් එකකට ආසන්න ප්‍රමාණයකින් (24.77%) පෙරමුණ ගත්තද, එහි ප්‍රතිශතය සියයට 7.44 කින් අඩු වී ඇත. “මෙය පසුබෑමකට වඩා විවිධාංගීකරණයක් පිළිබිඹු කරයි” යනුවෙන් හපුගොඩ මහතා සඳහන් කළේය. එල්ල වැනි අභ්‍යන්තර හා වෙරළබඩ ගමනාන්ත නව සංචාරක මනාපයන්ගෙන් වැඩි වැඩියෙන් ප්‍රතිලාභ ලබන බවත්, එල්ල ප්‍රධාන අභ්‍යන්තර සංචාරක කේන්ද්‍රස්ථානයක් ලෙස මතු වී ඇති බවත් ඔහු පැවසීය. එල්ල සමස්ත ගනුදෙනු වලින් සියයට 7.48 ක් වන අතර, එය මෙම කාලය තුළ සියයට 3.59 ක වර්ධනයක් වාර්තා කරයි. අහංගම, වැලිගම, දික්වැල්ල, මාතර සහ මිරිස්ස වැනි ගමනාන්තවල ශක්තිමත් වර්ධනයක් පෙන්නුම් කරමින්, “වඩාත්ම ආකර්ෂණීය කතාව දකුණු තීරය ඔස්සේ දිග හැරෙමින් පවතී,” යනුවෙන් හපුගොඩ මහතා සඳහන් කළේය. අහංගම සියයට 5.54 ක වර්ධනයක් වාර්තා කරමින් සමස්ත ගනුදෙනු වලින් සියයට 6.11 ක් දායක වූ අතර, වැලිගම සියයට 3.25 ක වර්ධනයක් සමඟ සියයට 4.91 ක දායකත්වයක් ලබා දුන්නේය. දික්වැල්ල සියයට 3.51 කින් (3.86%), මාතර සියයට 2.18 කින් (3.17%) සහ මිරිස්ස සියයට 0.88 කින් (3% කට වඩා වැඩි) වර්ධනය වී තිබේ. අනෙක් අතට, මහනුවර සහ ගාල්ල වැනි සාම්ප්‍රදායික සංචාරක මධ්‍යස්ථාන පිළිවෙලින් සියයට 5.96% සහ 5.37% ක දායකත්වයක් ලබා දෙමින් සුළු වශයෙන් පහත වැටීම් (සියයට 1.6ක් පමණ) වාර්තා කළේය. මෙම රටාවන් මගින් ශ්‍රී ලංකාවේ සංචාරක වර්ධනය භූගෝලීය වශයෙන් වඩාත් පුළුල් වී, සියල්ල ඇතුළත් වී, දේශීයව බලපෑම් ඇති කරන්නේ කෙසේද යන්න අවධාරණය කරන බව හපුගොඩ මහතා පැවසීය. 2026 වසර සඳහා ශ්‍රී ලංකාවේ දළ දේශීය නිෂ්පාදිතයේ (GDP) වර්ධනය 2025 දී ඇස්තමේන්තුගත සියයට 4.4 සිට සියයට 3.7 දක්වා මධ්‍යස්ථ වනු ඇතැයි Mastercard ආර්ථික විද්‍යා ආයතනය පුරෝකථනය කළද, පෞද්ගලික පරිභෝජනය, ආයෝජන, අඩු උද්ධමනය, ශක්තිමත් ප්‍රේෂණ ගලා ඒම, ඉහළ යන සංචාරක ආදායම සහ පහසු මුදල් ප්‍රතිපත්තිය හේතුවෙන් ආර්ථික ගම්‍යතාවය තවදුරටත් ඔරොත්තු දෙන බව හපුගොඩ මහතා ප්‍රකාශ කළේය.