ශ්රී ලංකාවේ සංචාරක කර්මාන්තය 2026 වසරේ ජනවාරි මාසයේදී සංචාරකයින් 277,327 දෙනෙකු දිවයිනට පැමිණීමත් සමඟ මෙතෙක් ඉතිහාසයේ මාසිකව වාර්තා වූ වැඩිම සංචාරක පැමිණීම සනිටුහන් කරමින් නව වාර්තාවක් පිහිටුවා ඇත. මෙය 2018 දෙසැම්බර් මාසයේ පැවති ඉහළම අගය මෙන්ම 2025 දෙසැම්බර් මාසයේ පැමිණීම ද අභිබවා යාමකි. පසුගිය වසරේ ජනවාරි මාසයට සාපේක්ෂව සියයට 9.7 ක වර්ධනයක් පෙන්නුම් කරන මෙම ප්රවණතාව, ශ්රී ලංකාවේ සංචාරක අංශය පූර්ණ ප්රකෘතිමත් වීමක් සහ ව්යාප්ත වීමේ අදියරක පවතින බව මනාව පැහැදිලි කරයි. ජනවාරි මාසය පුරා දෛනිකව සාමාන්යයෙන් සංචාරකයින් 8,946 ක් පමණ දිවයිනට පැමිණ ඇති අතර, ජනවාරි 15 වන දින පමණක් 10,483 දෙනෙකු පැමිණීම විශේෂත්වයකි.ප්රධාන මූලාශ්ර වෙළඳපොළවල් අතර ඉන්දියාව සංචාරකයින් 52,061ක් සමඟ සිය ප්රමුඛස්ථානය තවදුරටත් තහවුරු කරගත් අතර, එය සමස්ත සංචාරක පැමිණීමෙන් සියයට 19කි. එක්සත් රාජධානිය, ජර්මනිය, පෝලන්තය සහ ඇමරිකා එක්සත් ජනපදය යන රටවලින් ද පැමිණීම් සැළකිය යුතු ලෙස ඉහළ ගියද, රුසියාව, චීනය සහ ඕස්ට්රේලියාව වැනි සාම්ප්රදායික වෙළඳපොළවල් කිහිපයක පසුබෑමක් දක්නට ලැබුණි. කෙසේ වෙතත්, යුරෝපීය සහ ඉන්දියානු වෙළඳපොළවල ශක්තිමත් වර්ධනය එම අඩුව පියවීමට සමත් විය.සංචාරක බලධාරීන් 2026 වසර සඳහා සංචාරකයින් මිලියන 3ක ඉලක්කයක් සපුරා ගැනීමට අපේක්ෂා කරන අතර, ජනවාරි මාසයේ වාර්තාගත දායකත්වය එම ඉලක්කයෙන් සියයට 9.2ක් දැනටමත් ආවරණය කර තිබේ. එනමුදු, වසරේ ඉදිරි මාසවලදී සංචාරක පැමිණීම් අඩුවන කාලසීමාවන් තුළ ද මෙම වේගවත් වර්ධනය පවත්වා ගැනීම මිලියන 3ක වාර්ෂික ඉලක්කය ජය ගැනීම සඳහා අත්යවශ්ය වනු ඇත.
සංචාරක ක්ෂේත්රයේ නව වාර්තාවක්
