වර්තමානයේ ශීඝ්රයෙන් වර්ධනය වන පරිගණක සහ අන්තර්ජාලය ආශ්රිත අපරාධ මැඩලීම සඳහා නව පොලිස් කොට්ඨාසයක් ස්ථාපිත කිරීමට රජය තීරණය කර ඇති බව මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල මහතා ප්රකාශ කරයි. පොල්පිටිය ප්රදේශයේ අලුතින් ඉදිකළ පොලිස් ස්ථානය විවෘත කිරීමේ උත්සවයට එක්වෙමින් අමාත්යවරයා මේ බව අනාවරණය කළේය. දිනකට මෙරටින් සයිබර් අපරාධ 23ත් 25ත් අතර ප්රමාණයක් වාර්තා වන බව පෙන්වා දුන් ඔහු, එය ඉතා බරපතළ තත්ත්වයක් බව පෙන්වා දුන්නේය.මෙම නවීන පන්නයේ අපරාධවලට එරෙහිව කටයුතු කිරීම සඳහා පොලිස් දෙපාර්තමේන්තුව සතු තාක්ෂණික මෙවලම් සහ විමර්ශන නිලධාරීන්ගේ දැනුම ඉහළ නැංවීමට රජය සූදානම්ය. ඒ අනුව, ජාත්යන්තර ප්රමිතීන්ට අනුකූලව නව තාක්ෂණය සහ විශේෂිත පුහුණුව පොලිස් සේවයට එක් කිරීමේ නවීකරණ ක්රියාවලිය දැනටමත් සැලසුම් සහගතව ආරම්භ කර ඇති බව අමාත්යවරයා වැඩිදුරටත් සඳහන් කළේය.සයිබර් ආරක්ෂාව පමණක් නොව, සමස්ත පොලිස් දෙපාර්තමේන්තුවම අදූෂිත සහ කාර්යක්ෂම ආයතනයක් බවට පත් කිරීම රජයේ ප්රධාන අරමුණක් බව විජේපාල මහතා මෙහිදී අවධාරණය කළේය. පොලිස් සේවයේ ගෞරවය සුරකිමින් ජනතාවට ඉහළ සේවාවක් සැලසීම සඳහා දෙපාර්තමේන්තුව තුළ විශාල ප්රතිසංස්කරණ රැසක් ඉදිරියේදී සිදු කිරීමට නියමිත බවද හෙතෙම පැවසීය.විශේෂයෙන්ම දක්ෂ හා අවංක නිලධාරීන්ට සිය වෘත්තීය ගමනේ ඉහළට යාමට අවශ්ය පසුබිම සකස් කරන අතරම, වැරදි කරන නිලධාරීන්ට එරෙහිව දැඩිව නීතිය ක්රියාත්මක කරන බව අමාත්යවරයා පවසයි. විනය විරෝධී කටයුතුවල නිරත වන නිලධාරීන් සේවයෙන් ඉවත් කිරීමට අවශ්ය විධිමත් ක්රමවේදයන් දැනටමත් සකස් කර ඇති බව පවසමින් ඔහු පොලිස් සේවයේ විනය සම්බන්ධයෙන් දැඩි ස්ථාවරයක් ප්රකාශ කළේය.
සයිබර් අපරාධ මැඩලීමට අලුත් පොලිස් කොට්ඨාසයක්
