අග්‍රාමාත්‍ය සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය මහත්මිය ඊයේ (22) පැවසුවේ 2027 වසරේ සිට සියලුම පෙර පාසල් සඳහා දිවයින පුරා පොදු විෂය මාලාවක් හඳුන්වා දෙන බවයි. අග්‍රාමාත්‍යවරිය මෙම අදහස් පළ කළේ අඟහරුවාදා (22) පාර්ලිමේන්තුවේදී පැවති අධ්‍යාපන ප්‍රතිසංස්කරණ පිළිබඳ පාර්ලිමේන්තු අනු කමිටු රැස්වීමකට සභාපතිත්වය දරමිනි.ළමා මුල් අවධි විෂයමාලා රාමුව මේ වන විටත් සම්පූර්ණ කර ඇති බවත්, පෙර පාසල් ගුරුවරුන් 19,000 කට ආසන්න සංඛ්‍යාවක් සඳහා පුහුණුව 2025 නොවැම්බර් 25 වැනිදා ආරම්භ කිරීමට නියමිත බවත් ඇය පැවසුවාය. නව විෂය මාලාව යටතේ පාඩම් ඉගැන්වීම සඳහා ගුරුවරුන් පූර්ණ ලෙස සන්නද්ධ කිරීම සහතික කිරීම සඳහා පුහුණු සැසි සෑම පළාතකම පවත්වනු ඇත.තවදුරටත් අදහස් දැක්වූ ආචාර්ය අමරසූරිය මහත්මිය අවධාරණය කළේ, රජයේ ප්‍රතිපත්තිය පාසල් වසා දැමීම නොව, සියලුම සිසුන් සඳහා ගුණාත්මක අධ්‍යාපනයක් සහ සමාන අවස්ථා සහතික කිරීම සඳහා ඒවා ඒකාබද්ධව සංවර්ධනය කිරීම බවයි. මෙම රැස්වීම සඳහා පාර්ලිමේන්තු මන්ත්‍රීවරුන්, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ ලේකම් නාලක කළුවැව මහතා, ජාතික අධ්‍යාපන ආයතනයේ නිලධාරීන් සහ ජ්‍යෙෂ්ඨ අමාත්‍යාංශ නියෝජිතයින් සහභාගී විය.
සියලුම පෙර පාසල් සඳහා 2027 සිට දිවයින පුරා පොදු විෂය මාලාවක් – අගමැති ආචාර්ය හරිනි අමරසූරිය
