දේශපාලන අතකොළුවක් බවට පත් වූවාදැයි සැක.
දින 14ක් ඇතුළත කරුණු වාර්තා කරන්න.
ජනමාධ්‍යවල පලබූ වාර්තා ගැන වෛද්‍ය චමල් සෞඛ්‍ය ලේකම්ගෙන් කරුණු විමසයි.
පසුගිය ඔක්තෝම්බර් මාසයේ සිට දේශපාලන කටයුතුවල නිරත වීම සඳහා රාජ්‍ය සේවයෙන් ඉවත් වී කටයුතු කරන, රාජ්‍ය සේවය හැර ගියා සේ සේවයට වාර්තා නොකර සිටින පසුගිය සැප්තැම්බර් මාසයෙන් පසුව රජයෙන් වැටුප් නොලබන තමන් රාජකාරි වැඩ තහනමකට ලක්වූ බවට ප්‍රසිද්ධ විද්‍යුත් සහ මුද්‍රිත ජනමාධ්‍යවල පළවී ඇති ප්‍රවෘත්තියෙන් තමන් පුදුමයට පත්වූ බවත් රටේ සිවිල් පුරවැසියෙකුට එරෙහිව රාජකාරී වැඩ තහනම් කිරීමේ ලිපියක් නිකුත් කරන්නේ කුමන නෛතික පදනමක් යටතේදැයි සමගි ජන බලවේග රත්මලාන ආසන සංවිධායක විශේෂඥ වෛද්‍ය චමල් සංජීව මහතා සෞඛ්‍ය අමාත්‍යාංශයේ ලේකම්වරයාගෙන් කරුණු විමසීමක් කොට ඇත.
ආයතන සංග්‍රහය පළමු සහ දෙවැනි පරිච්ඡේද වලට අනුවද රාජ්‍ය පරිපාලන කාර්ය පටිපාත වලටද අනුවද තමන් තවදුරටත් රාජ්‍ය සේවකයෙකු නොවන බැවින් රාජ්‍ය සේවකයෙකු නොවන පුද්ගලයකුට එරෙහිව රාජකාරී වැඩ තහනම් කිරීමේ ලිපියක් නිකුත් කළ බවට ජනමාධ්‍යයෙහි පළවන කරුණු සත්‍ය වන්නේ නම් අනීතික සහ තමාගේ කීර්ති නාමයට හානි කිරීම සඳහා සැලසුම් සහගතව සිදුකළ දේශපාලන පළිගැනීම සඳහා වන ක්‍රියාවක් බැවින් අදාල ක්‍රියාවට සෞඛ්‍ය ලේකම්වරයා දැනුවත්ව හෝ නොදැනුවත්ව සම්බන්ධව ඇත්නම් ඒ සම්බන්ධව නෛතිකව ක්‍රියා මාර්ග ගන්නා බවද වෛද්‍ය චමල් සංජීව මහතා සෞඛ්‍ය ලේකම්වරයා වෙත ලියාපදිංචි තැපෑලෙන් දැනුම් දී ඇත.
එසේම තවදුරටත් රාජ්‍ය සේවයේ කටයුතු නොකරන, රජයෙන් වැටුප් නොලබන, සේවය හැරගොස් සිටින තමාට එරෙහිව මෙවැනි ලිපියක් නිකුත් කිරීම සඳහා පූර්ව වශයෙන් කරුණු නිසි පරිදි විමර්ශනයට ලක් නොකොට වැරදි නිර්දේශ සෞඛ්‍ය සේවා කමිටුව වෙත යොමු කොට සෞඛ්‍ය ලේකම්වරයා හරහා මෙවැනි ලිපියක් නිකුත් කර ගැනීමට අවශ්‍යතාවය තිබුණේ කාටදැයි විමර්ශනය කළ යුතු බවත් වගකිවයුතු සියලු නිලධාරින් රජය අපහසුතාවට පත් කිරීම යටතේ විමර්ශනයට භාජනය කළ යුතු බවද චමල් සංජීව මහතා සෞඛ්‍ය ලේකම්වරයා වෙත වැඩිදුරටත් දන්වා ඇත.
මෙම සිදුවීම සම්බන්ධයෙන් රාජ්‍ය සේවා කොමිෂන් සභාවත් පාර්ලිමේන්තුව පෙත්සම් කාරක සභාවටත් වගකිවයුතු අංශ වලටත් මේ වන විටත් දන්වා ඇති බවද ඔහු වැඩිදුරටත් සඳහන් කරයි.
මෙවන් අසත්‍ය තොරතුරු ජනමාධ්‍යවට මුදා හැරීමට පාදක වූ අන්දමට වැඩ තහනම් කිරීමෙන් ලිපියක් නිකුත් කිරීමෙන් තමන්ට සිදුවූ අපහාසය සම්බන්ධයෙන්ද සෞඛ්‍ය ලේකම්වරයා වෙත තම නීතිඥ මාර්ගයේ නිත්‍යානුකූලව කටයුතු කරන බවද ඔහු සඳහන් කොට ඇත.
