ප්රංශයේ ශ්රී ලංකා තානාපති සහ යුනෙස්කෝවේ නිත්ය නියෝජිත මනීෂා ගුණසේකර මහත්මිය පසුගියදා (දෙසැම්බර් 19) පැරිස් නුවර පිහිටි යුනෙස්කෝ මූලස්ථානයේදී එහි අධ්යක්ෂ ජනරාල් ඛලීඩ් එල්-ඉනානි (Khaled El-Enany) මහතා හමුවූවාය. එහිදී සුළි කුණාටුවෙන් පීඩාවට පත් ශ්රී ලංකාවට ලබා දෙන හදිසි සහ මධ්යකාලීන ආධාර පිළිබඳව දීර්ඝ වශයෙන් සාකච්ඡා කෙරිණි. සුළි කුණාටුවෙන් සිදු වූ හානිය සහ රජයේ ප්රතිසංස්කරණ සැලසුම් පිළිබඳව තානාපතිවරිය අධ්යක්ෂ ජනරාල්වරයා දැනුවත් කළ අතර, ගංවතුරෙන් හානියට පත් ලේඛනාගාර වාර්තා සංරක්ෂණය සඳහා ‘උරුම හදිසි අරමුදල’ (Heritage Emergency Fund) යටතේ යුනෙස්කෝව ලබා දුන් කඩිනම් සහාය පිළිබඳව රජයේ කෘතඥතාව පළ කළාය.මෙහිදී ශ්රී ලංකාවට සිය ශෝකය පළ කළ අධ්යක්ෂ ජනරාල්වරයා, යුනෙස්කෝවේ පූර්ණ සහයෝගය සහ සහයෝගීතාව යළිත් තහවුරු කළේය. සංස්කෘතික උරුමයන් යථා තත්ත්වයට පත් කිරීම, පාසල් සහ මනෝවිද්යාත්මක ආධාර කෙරෙහි අවධානය යොමු කරමින් අධ්යාපන ක්ෂේත්රයට සහාය වීම මෙන්ම, විද්යාත්මක වැඩසටහන් හරහා පූර්ව අනතුරු ඇඟවීමේ පද්ධති ශක්තිමත් කිරීමට තානාපති සහාය ලබා දීමට ඔහු එකඟ විය. මෙම ආධාර නවදිල්ලියේ පිහිටි යුනෙස්කෝ ප්රාදේශීය කාර්යාලය හරහා සම්බන්ධීකරණය කෙරෙනු ඇත.අධ්යක්ෂ ජනරාල්වරයාගේ පත්වීම සම්බන්ධයෙන් විදේශ කටයුතු අමාත්ය විජිත හේරත් මහතා එවූ සුබපැතුම් පණිවිඩය ද තානාපතිවරිය විසින් මෙහිදී භාර දුන් අතර, යුනෙස්කෝවේ මෙහෙවරට ශ්රී ලංකාවේ ඇති කැපවීම නැවත අවධාරණය කළාය. අග්රාමාත්ය හරිනි අමරසූරිය මහත්මිය සහ විදේශ අමාත්යවරයා ශ්රී ලංකාව සහ යුනෙස්කෝව අතර පවතින සබඳතාව ශක්තිමත් කිරීමට දක්වන දායකත්වය මෙහිදී අධ්යක්ෂ ජනරාල්වරයාගේ ඇගයීමට ලක්විය. මෙම හමුව සඳහා යුනෙස්කෝ ලේකම් කාර්යාලයේ ජ්යෙෂ්ඨ නිලධාරීන් සහ ශ්රී ලංකා නිත්ය නියෝජිත කණ්ඩායමේ නිලධාරීන් ද සහභාගී වූහ.
සුළි කුණාටුවෙන් පසු යුනෙස්කෝවෙන් ශ්රී ලංකාවට පූර්ණ සහාය!
