රටේ සෞඛ්ය පද්ධතිය වඩාත් ශක්තිමත් කරමින් වෘත්තීය කාණ්ඩ කිහිපයක පත්වීම්ලාභීන් 154 දෙනෙකු වෙනුවෙන් පත්වීම් ලිපි ප්රදානය කිරීමේ නිල උත්සවය හෙට (10) පැවැත්වීමට නියමිතය. මෙම විශේෂ අවස්ථාව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් සහ අමාත්යාංශ ලේකම් විශේෂඥ වෛද්ය අනිල් ජාසිංහ මහතා ඇතුළු සම්භාවනීය නිලධාරීන්ගේ සහභාගීත්වයෙන් සිදු කෙරේ. කොළඹ ජාතික රෝහලේ බාහිර රෝගී අංශ ශ්රවණාගාරයේදී පෙරවරු 11.00 ට මෙම කටයුතු ආරම්භ වනු ඇත.මෙහිදී විශේෂයෙන්ම තාක්ෂණික හා වෘත්තීය පුහුණුව නිමකළ නිලධාරීන් පිරිසක් සේවයට එක්වන අතර, ඒ යටතේ විකිරණ ශිල්පී උපාධිධාරීන් 69 දෙනෙකුට සහ ශ්රවණවේදී කාර්මික ශිල්පීන් 10 දෙනෙකුට ස්ථිර පත්වීම් හිමිවේ. මෙම පිරිස සිය මාස හයක අනුස්ථාපන සහ සමායෝජන පුහුණු පාඨමාලාව සාර්ථකව අවසන් කළ දක්ෂ වෘත්තිකයන් වීම සුවිශේෂී කරුණකි. රෝහල් පද්ධතියේ රෝග විනිශ්චය සහ ප්රතිකාර සේවා කඩිනම් කිරීමට මොවුන්ගේ දායකත්වය අතිශය වැදගත් වනු ඇත.මීට අමතරව, සීමිත පදනම මත බඳවා ගනු ලබන ප්රාථමික අර්ධ ශිල්පීය (PL-2) සේවා ගණයේ නිලධාරීන් සඳහා ද මෙහිදී පත්වීම් පිරිනැමේ. ඒ අනුව නව රසායනාගාර සහායකයින් 71 දෙනෙකු සහ කීටවිද්යා සහායකයින් 04 දෙනෙකු සිය නව තනතුරුවල වැඩභාර ගැනීමට නියමිතය. මෙම බඳවා ගැනීම් හරහා රජයේ රසායනාගාර සේවාවන් මෙන්ම මදුරුවන් මර්දනය ඇතුළු කීටවිද්යා ක්ෂේත්රයේ කටයුතු වඩාත් කාර්යක්ෂම වනු ඇතැයි අපේක්ෂා කෙරේ.
සෞඛ්ය සේවයට අලුත් ජවයක්: නව නිලධාරීන් 154කට හෙට පත්වීම්
