පෘතුගාලයේ සුපිරි පාපන්දු ක්‍රීඩක ක්‍රිස්ටියානෝ රොනාල්ඩෝ, විශාල සෞදි ගිවිසුමක් හේතුවෙන් පළමු පාපන්දු ක්‍රීඩක ප්‍රකෝටිපතියා (Football Billionaire) බවට පත්ව ඇති බව වාර්තා වේ. රොනාල්ඩෝ සියලුම ක්‍රීඩා ක්ෂේත්‍රයන්හි සිටින ප්‍රකෝටිපති ක්‍රීඩකයන්ගේ කණ්ඩායමට එක් වන අතර, ඔහු විසින් උපයාගෙන ඇති ධනස්කන්ධයෙන් බහුතරයක් ලැබී ඇත්තේ වැටුප් වශයෙන් වීම විශේෂත්වයකි. උදාහරණයක් ලෙස, බ්ලූම්බර්ග් ධනවත්ම දර්ශකයට අනුව, රොජර් ෆෙඩරර්ගේ ධනයෙන් විශාලම කොටස ලැබී ඇත්තේ “On Holdings AG” නම් ධාවන ඇඟලුම් සන්නාමයේ කොටස්වලින් වන අතර, මයිකල් ජෝර්ඩන්ගේ ධනයෙන් බහුතරයක් නයික් (Nike) සමඟ ඇති දීර්ඝ කාලීන අනුග්‍රාහක ගිවිසුම් සහ NBA හි චාලට් හෝනට්ස් (Charlotte Hornets) කණ්ඩායමේ කොටස්වලින් ලැබී ඇත.වෘත්තීය මට්ටමේ ක්‍රීඩාවේ නියැලෙන වැඩිම වයස්ගතම ක්‍රීඩකයන්ගෙන් කෙනෙකු වන රොනාල්ඩෝගේ අවධානය දැන් යොමු වී ඇත්තේ ඔහුගේ විශ්‍රාමයෙන් පසු ජීවිතය වෙතයි. ඔහු පවසා ඇත්තේ Al-Nassr සමාජයෙන් විශ්‍රාම ගැනීමට අපේක්ෂා කරන බවයි.ඔහුගේ සිහිනය වී ඇත්තේ ඩේවිඩ් බෙකම් (Inter Miami හි සම හිමිකරු) ගේ අඩිපාරේ යමින්, පාපන්දු සමාජ කිහිපයක් මිලදී ගෙන ඒවායේ හිමිකරු වීම බව ද ඔහු ප්‍රකාශ කර තිබේ.මෙම සිහිනය යථාර්ථයක් බවට පත් කරමින්, රොනාල්ඩෝට ඔහුගේ වත්මන් Al-Nassr සමාජය සමඟ ගිවිසුම දීර්ඝ කිරීමේ කොටසක් ලෙස එහි 15% ක කොටස් හිමිකාරිත්වයක් ලැබී ඇති බව වාර්තා වේ. ඔහු මේ වන විට ගොඩනගා ඇති දැවැන්ත ධනස්කන්ධය සැලකිල්ලට ගත් විට, ඔහු අවසානයේ ක්‍රීඩාවෙන් සමුගැනීමෙන් පසු තවත් බොහෝ ව්‍යාපාරික විකල්පයන් ඔහුට විවෘත වීමට ඉඩ ඇත.
සෞදි ගිවිසුමකින් රොනාල්ඩෝ පළමු පාපන්දු ප්‍රකෝටිපතියා බවට පත්වෙයි
