ඉන්දියාවේ ළමා මරණ කිහිපයකට හේතු වූ මාරාන්තික කැස්ස සිරප් (Cough Syrups) වර්ග පිළිබඳව කලාපය පුරා අවධානය යොමු වී ඇති අතර, අනාරක්ෂිත ඖෂධ දේශීය වෙළඳපොළට ඇතුළු වීම වැළැක්වීමට ශ්‍රී ලංකා බලධාරීන් දැඩි අවධානයෙන් පසුවේ.ලෝක සෞඛ්‍ය සංවිධානය (WHO) පවසා සිටියේ, මෙම සිරප් මගින් දරුණු සෞඛ්‍ය අවදානම් ඇති කරන බවත්, ඉන්දියාවේ මධ්‍ය ප්‍රදේශ් ප්‍රාන්තයේ වයස අවුරුදු පහට අඩු ළමුන් කිහිප දෙනෙකුගේ මරණවලට මේවා සම්බන්ධ බවත්ය. කෙසේ වෙතත්, ප්‍රශ්නගත කැස්ස සිරප් වර්ග තුන හෝ ඒවා නිෂ්පාදනය කරන සමාගම් ශ්‍රී ලංකාවේ ලියාපදිංචි කර නොමැති බවට ජාතික ඖෂධ නියාමන අධිකාරියේ (NMRA) ඉහළ පෙළේ ආරංචි මාර්ග තහවුරු කර තිබේ.ඉන්දියාවේ මධ්‍යම ඖෂධ ප්‍රමිති පාලන සංවිධානය (CDSCO) ට අනුව, Coldrif (Sresan Pharmaceutical විසින් නිෂ්පාදිත), Respifresh TR (Rednex Pharmaceuticals) සහ ReLife (Shape Pharma) යන මෙම ඖෂධවල, විශේෂයෙන් ළමුන් අතර, දරුණු හෝ මාරාන්තික රෝග ඇති කළ හැකි හානිකර ද්‍රව්‍ය අඩංගු බව සොයාගෙන ඇත. ”නම සඳහන් කළ නිෂ්පාදන NMRA අනුමත ඖෂධ ලැයිස්තුවේ නොමැති බව අපි සනාථ කර තිබෙනවා. එබැවින්, මෙම සිරප් වර්ග නීත්‍යානුකූලව දේශීය වෙළඳපොලේ තිබීමට කිසිදු හැකියාවක් නැහැ” යනුවෙන් NMRA ප්‍රකාශකයෙක් පැවසීය.හිටපු සෞඛ්‍ය අමාත්‍ය කෙහෙළිය රඹුක්වැල්ල මහතාගේ ධූර කාලය තුළ හදිසි මිලදී ගැනීම් යටතේ ප්‍රමිතියෙන් තොර හෝ දුර්වල ලෙස නිෂ්පාදිත ඖෂධ ඉන්දියාවෙන් දේශීය වෙළඳපොළට ඇතුළු වූ අවස්ථා පැවති බවට චෝදනා එල්ල වේ. ඉන්දියාවෙන් ආනයනය කරන ලද ඖෂධවල ගුණාත්මකභාවය පිළිබඳ කනස්සල්ල ශ්‍රී ලංකාවට අලුත් දෙයක් නොවේ. 2023 වසරේදී ඉන්දියාවේ නිෂ්පාදිත නිර්වින්දන ඖෂධ ලබා දීමෙන් රෝගීන් දෙදෙනෙකු මිය යෑමට සිදුවූ අතර, ඉන්දියාවේ නිෂ්පාදිත අක්ෂි ඖෂධ හේතුවෙන් රෝගීන් 10 දෙනෙකුගේ දෘශ්‍යාබාධ ඇතිවීම ඊට හොඳම උදාහරණ වේ.මෙම කලාපයට ඖෂධ සපයන ප්‍රධාන සැපයුම්කරුවෙකු ඉන්දියාව වන අතර, ඇතැම් කාණ්ඩවල ගුණාත්මකභාවය පාලනය කිරීමේ සහ අධීක්ෂණය කිරීමේ හිඩැස් හේතුවෙන් වරින් වර මෙවැනි බරපතල සෞඛ්‍ය අවදානම් ඇති වී තිබේ. එබැවින්, දේශීය සෞඛ්‍ය බලධාරීන් තත්ත්වය සමීපව නිරීක්ෂණය කරමින් සිටී.
ළමුන්ගේ මරණවලට හේතු වූ ඉන්දීය කැස්ස සිරප් වර්ග ශ්‍රී ලංකාවේ ලියාපදිංචි නෑ: NMRA සහතිකය
