පසුගියදා ඇති වූ ආපදා තත්ත්වය හේතුවෙන් පළාත් කිහිපයක පාසල් පද්ධතියට සහ ප්රවාහන සේවාවලට එල්ල වූ බාධා සැලකිල්ලට ගනිමින්, 2026 අධ්යයන වර්ෂය සඳහා පාසල් කාලසීමාව දීර්ඝ නොකිරීමට අධ්යාපන අමාත්යාංශය තීරණය කර ඇත. ඒ අනුව, අධ්යාපන හා ප්රවාහන පද්ධතීන් යථා තත්ත්වයට පත්වන තෙක් 5 ශ්රේණියේ සිට 13 ශ්රේණිය දක්වා පාසල් කාලය පෙර පරිදිම පෙ.ව. 7:30 සිට ප.ව. 1:30 දක්වා ක්රියාත්මක වේ. රජයේ පාසල්, රජයේ අනුමත පෞද්ගලික පාසල් සහ පිරිවෙන්වල 2026 වසරේ පළමු පාසල් වාරය ජනවාරි 5 වනදා ආරම්භ වීමට නියමිතය. සංශෝධිත ව්යුහය යටතේ 6 සිට 13 ශ්රේණි දක්වා සිසුන් සඳහා දිනකට මිනිත්තු 45 බැගින් වූ කාලපරිච්ඡේද 7ක් පැවැත්වෙනු ඇත.2026 වසරේදී 1 ශ්රේණිය සහ 6 ශ්රේණිය සඳහා නව අධ්යාපන ප්රතිසංස්කරණ හඳුන්වා දෙන අතර, 6 ශ්රේණියේ විධිමත් අධ්යයන කටයුතු ජනවාරි 21 වනදා ආරම්භ වේ. 1 ශ්රේණිය සඳහා සිසුන් හඳුනාගැනීමේ ක්රියාවලිය ජනවාරි 5 වනදා ඇරඹෙන අතර, ඔවුන්ගේ විධිමත් පන්ති කාමර ඉගෙනුම් කටයුතු ජනවාරි 29 වනදා සිට ක්රියාත්මක වනු ඇත. 1 ශ්රේණිය සඳහා වන ක්රියාකාරකම් පොත් සහ 6 ශ්රේණිය සඳහා වන ඉගෙනුම් මොඩියුල (Learning Modules) අධ්යයන කටයුතු ඇරඹීමට පෙර ලබා දෙන බවත්, සෙසු ශ්රේණි සඳහා වන පෙළපොත් මේ වන විටත් බෙදා අවසන් කර ඇති බවත් අමාත්යාංශය සඳහන් කරයි. මේ අතර, 2025 අපොස උසස් පෙළ විභාගයේ ඉතිරි සැසිවාරයන් 2026 ජනවාරි 12 සිට 20 දක්වා පැවැත්වීමට නියමිතය.
