ඉන්දියාව සහ ශ්‍රී ලංකාව සම සත්කාරකත්වය දරන කණ්ඩායම් 20කින් සමන්විත 2026 ICC පිරිමි T20 ලෝක කුසලාන තරගාවලියේ තාවකාලික කාණ්ඩ, ‘ක්‍රික්බස්’ (Cricbuzz) වෙබ් අඩවිය විසින් වාර්තා කර ඇති අතර, අන්තර්ජාතික ක්‍රිකට් කවුන්සිලය (ICC) විසින් මෙම කාණ්ඩ බෙදීම නිල වශයෙන් තවමත් තහවුරු කර නොමැත. ක්‍රික්බස් වාර්තාවට අනුව, ‘A’ කාණ්ඩයට ඉන්දියාව, පකිස්ථානය, නෙදර්ලන්තය, නැමීබියාව සහ එක්සත් ජනපදය ඇතුළත් වන අතර, ‘B’ කාණ්ඩයේ ශ්‍රී ලංකාව, ඕස්ට්‍රේලියාව, සිම්බාබ්වේ, අයර්ලන්තය සහ ඕමානය සිටී. ‘C’ කාණ්ඩයට එංගලන්තය, බටහිර ඉන්දීය කොදෙව්, බංග්ලාදේශය, නේපාලය සහ ඉතාලිය ද, ‘D’ කාණ්ඩය දකුණු අප්‍රිකාව, නවසීලන්තය, ඇෆ්ගනිස්ථානය, එක්සත් අරාබි එමීර් රාජ්‍යය සහ කැනඩාවෙන් ද සමන්විත වේ. තරඟාවලියේ ආකෘතියට අනුව, සෑම කාණ්ඩයකින්ම පළමු කණ්ඩායම් දෙක ‘සුපිරි 8’ වටයට සුදුසුකම් ලබන අතර, මෙම තරගාවලිය ඉන්දියාවේ මුම්බායි, කොල්කටා, චෙන්නායි, දිල්ලි සහ අහමදාබාද් යන සත්කාරක නගරවලත්, ශ්‍රී ලංකාවේ කොළඹ සහ මහනුවර යන නගරවලත් පැවැත්වීමට නියමිතය. ICC විසින් නිල කාණ්ඩ බෙදීම සහ සම්පූර්ණ තරග කාලසටහන පසුව නිකුත් කරනු ඇතැයි අපේක්ෂා කෙරේ.
2026 T20 ලෝක කුසලාන තරගාවලියේ තාවකාලික කාණ්ඩ ක්‍රික්බස් වාර්තා කරයි
