76 වසර ගැන පම්පෝරි නොගහ, තවදුරටත් බොරු නොකියා තෙල් ගැටලුවට ස්ථිර විසදුමක් දෙන්න – විපක්ෂ නායක සජිත් ප්‍රේමදාස මහතා
ඊයේ රාත්‍රියේ සිට තෙල් බෙදාහරින්නන් සහ රජය සමග ඇතිව තිබෙන අර්බුධය නිසා අප රටේ ජනතාව විශාල වශයෙන් අසහනයට පීඩනයට පත්ව ඇති බවත් වත්මන් රජය තෙල් බෙදාහරින්නන් සමග ඇති කර ගත් ගිවිසුම කිසිදු සාකච්ඡාවකින් තොරව හිටිහැටියේම බැහැර කිරිම තුළ මේ වන විට විශාල තෙල් පෝලිමක් මතුව තිබෙන බවත් විපක්ෂ නායකවරයා පැවසීය.
විපක්ෂ නායක සජිත් ප්‍රේමදාස මහතා මේ බව කියා සිටියේ මැදවච්චිය පුල්එළිය දිවුල්වැව ඓතිහාසික කිරලාගල පුරාණ විහාරයේ විහාරාධිපති ශබ්ද විශාරද කච්චායන වංශාලංකාර ශාසන කීර්ති ශ්‍රී පුජ්‍යපාද පිලියන්දල සුබෝධ ස්වාමීන්ද්‍රයානන් වහන්සේගේ අනුශාසනය පරිදි එම විහාරස්ථනයේ ඉදිකරන ලද සරෝශිකා සෙනෙවිරත්න අනුස්මරණ චෛත්‍ය රාජයාණන් වහන්සේගේ කොත නිරාවරණය කිරිමේ මහා පුන්‍යකර්මය සිදුවූ අවස්ථාවට එක්වීමෙන් අනතුරු මාධ්‍ය වෙත අදහස් දක්වමිනි
මෙය වත්මන් රජයේ අදක්ෂකම නොහැකියාව සහ රටක් පාලනය කළ නොහැකි වීම නිසා ඇතිවු අර්බුධය නිසා විශාල පිරිසක රැකියා අහිමි වී ආර්ථිකයට මරු පහරක් වී විදේශ ආයෝජකයන් පවා රටට ඒම අධෛර්මයත් වන බවත් විපක්ෂ නායකවරයා පැවසීය.
එම නිසා වහාම ක්‍රියාත්මක වන පරිදි මේ අර්බුධය විසදිය යුතු බවත් මින් පීඩනයට පත් වන්නේ ජනාධිපති අගමැති හෝ මැති ඇමතිවරු නොව සාමාන්‍ය ජනතාව බවත් එබැවින් තෙල් බෙදාහරින්නන් සමග සාකච්ඡා කර මෙම ගිවිසුමට වහාම විසදුම් සැපයීම රජයේ වගකීම බවත් මින් රජයට හෝ ජනාධිපතිවරයාට පැන යා නොහැකි බවත් පළා යන දේශපාලනය මගහරින බොරු කියන දේශපාලනය නතර කර තෙල් ගැටලුවට විසදුම් ලබා දිය යුතු බවත් විපක්ෂ නායක සජිත් ප්‍රේමදාස මහතා පැවසීය.
එමෙන්ම 76 වසරක් ගැන පම්පෝරි නොගහ මෙම ගැටලුවට විසදුම් ඉදිරිපත් කරන ලෙසත් නොහැකියාව නොව හැකියාව පෙන්වා තෙල් ගැටලුව විසඳා වහාම තෙල් ලබා දීමට කටයුතු කරන ලෙස රජයෙන් ඉල්ලා සිටින බවත් විපක්ෂ නායකවරයා වැඩිදුරටත් පැවසීය.
