iPhone පරිශීලකයින්ට හදිසි අනතුරු ඇඟවීමක්: ඔබගේ දුරකථනය වහාම යාවත්කාලීන කරන්න!

තම මෘදුකාංග පද්ධතියේ පවතින බරපතල ආරක්ෂක දුර්වලතා දෙකක් හේතුවෙන් වහාම ක්‍රියාත්මක වන පරිදි iPhone යාවත්කාලීන කරන ලෙස ඇපල් (Apple) සමාගම සියලුම පරිශීලකයින්ගෙන් හදිසි ඉල්ලීමක් කර තිබේ. “අතිශය සංකීර්ණ” ප්‍රහාර මාලාවක් සඳහා මෙම දුර්වලතා භාවිත කර ඇති බව හඳුනාගෙන ඇති අතර, විශේෂයෙන්ම Safari ඇතුළු සියලුම බ්‍රවුසර සඳහා යොදාගන්නා WebKit පද්ධතිය මෙහිදී අනතුරට ලක්ව ඇත. මෙමගින් හැකර්වරුන්ට හානිකර වෙබ් අඩවියක් හරහා පරිශීලකයෙකුගේ උපාංගයට ඇතුළු වී එහි දත්ත පාලනය කිරීමේ හැකියාව පවතින බව සමාගම පවසයි.​මෙම ප්‍රහාරයන් ලොව පුරා සිටින බිලියන 1.8 ක් වූ සියලුම iPhone පරිශීලකයින් ඉලක්ක කර ගත් මහා පරිමාණ ප්‍රහාරයක් නොවන බවත්, කිසියම් නිශ්චිත පුද්ගලයින් පිරිසක් ඉලක්ක කර ගනිමින් දියත් වූවක් බවත් ඇපල් සමාගම අවධාරණය කරයි. කෙසේ වෙතත්, මෙම ආරක්ෂක සිදුරු පවතින තාක් ඕනෑම උපාංගයක් අනතුරට ලක්වීමේ අවදානමක් පවතින බැවින්, iPhone සහ iPad සඳහා නිකුත් කර ඇති නවතම හදිසි ආරක්ෂක යාවත්කාලීන කිරීම් (Security Updates) වහාම ස්ථාපනය කර ගන්නා ලෙස විශේෂඥයෝ උපදෙස් දෙති. මෙම ප්‍රහාර පිටුපස සිටින්නේ කවුරුන්ද යන්න ඇපල් සමාගම මෙතෙක් හෙළි කර නොමැති අතර, උපාංගවල ආරක්ෂාව තහවුරු කර ගැනීමට නිරන්තරයෙන් මෘදුකාංග යාවත්කාලීනව තබා ගැනීම අත්‍යවශ්‍ය බව ඔවුන් යළිත් මතක් කර දෙයි.