පොලිස් විශේෂ කාර්ය බළකායේ බස්නාහිර උතුරු ඒකකයේ නිලධාරීන් කණ්ඩායමක් විසින් අඟහරුවාදා (11) රාගම, කැන්දලියද්දපාලුව ප්‍රදේශයේදී සිදු කළ වැටලීමකදී ‘අයිස්’ නමැති මත්ද්‍රව්‍ය ග්‍රෑම් 52.6ක් සන්තකයේ තබාගෙන සිටි පුද්ගලයකු අත්අඩංගුවට ගෙන ඇත. පොලිසියට අනුව, එම ප්‍රදේශයේම පදිංචි 34 හැවිරිදි සැකකරු වැඩිදුර විමර්ශන සඳහා රාගම පොලිසියට භාර දී තිබේ. වෙනම සිද්ධියකින්, පොලිස් විශේෂ කාර්ය බළකායේ පුවරසන්කුලම් කඳවුරේ නිලධාරීන් ඊයේ මධ්‍යම රාත්‍රියේ මන්නාරම, මාදු පොලිස් වසමේ ඉරනිඉලුප්පුකුලම් ප්‍රදේශයේදී නීතිවිරෝධී මත්පැන් වැටලීමක් සිදු කර ඇත. එහිදී, එම ප්‍රදේශයේම පදිංචි 25 හැවිරිදි සැකකරුවෙකු නීතිවිරෝධී මත්පැන් ලීටර් 25ක්, ගෝඩා ලීටර් 80ක් සහ තඹ භාජනයක් ඇතුළු මත්පැන් නිෂ්පාදනය සඳහා යොදා ගත් උපකරණ තොගයක් සමඟ අත්අඩංගුවට ගෙන මාදු පොලිසියට භාර දී තිබේ. මීට අමතරව, ඊයේ දිනයේ පොලිස් විශේෂ කාර්ය බළකායේ හාලිඇල කඳවුර මගින් දික්වැල්ල ප්‍රදේශයේ සිදු කළ වැටලීමකදී ගෝඩා ලීටර් 160ක් සමඟ තවත් සැකකරුවෙකු අත්අඩංගුවට ගෙන ඇත. එම ප්‍රදේශයේම පදිංචි 40 හැවිරිදි සැකකරු හාලිඇල පොලිස් ස්ථානයට භාර දී තිබේ.
STF මෙහෙයුම් වලින් ‘අයිස්’ සහ නීතිවිරෝධී මත්පැන් තොග සමඟ සැකකරුවන් කිහිප දෙනෙක් අත්අඩංගුවට!
