අග්රාමාත්ය සහ අධ්යාපන අමාත්ය හරිනි අමරසූරිය මහත්මිය ඉලක්ක කර ගනිමින් දියත් කර ඇති ද්වේෂසහගත මඩ මෙහෙයුම සහ පෞද්ගලික අපහාසයන් ශාස්ත්රාලීය විද්වතුන්, වෘත්තිකයන් සහ සිවිල් සමාජ ක්රියාකාරීන් පිරිසක් දැඩි ලෙස හෙළා දැක තිබේ. ඒකාබද්ධ ප්රකාශයක් නිකුත් කරමින් ඔවුන් පෙන්වා දෙන්නේ, මෙම ප්රහාර ප්රජාතන්ත්රවාදී සමාජයක ශිෂ්ට සම්පන්නභාවයේ සියලු සීමාවන් ඉක්මවා ගොස් ඇති බවයි. ජාතික හා ජාත්යන්තර වශයෙන් ගෞරවයට පාත්ර වූ කාන්තා නායිකාවක කෙරෙහි පවතින ස්ත්රී ද්වේෂී ඊර්ෂ්යාව සහ වෛරය මෙම ප්රහාරයන්ට මූලික වී ඇති බව ඔවුහු පවසති. පටු දේශපාලනික හා මතවාදී අරමුණු වෙනුවෙන් පසුගාමී බලවේග පතුරුවන මෙවැනි ප්රචාරයන්ට නොරැවටෙන ලෙස මහජනතාවගෙන් ඉල්ලා සිටින එම පිරිස, මෙවැනි මෙහෙයුම් මගින් සදාචාරාත්මක දේශපාලන සංවාදය බරපතල ලෙස පිරිහීමට ලක්වන බවට අනතුරු අඟවති.අධ්යාපන අමාත්යාංශය යටතේ සකස් කළ පාසල් පෙළපොතක සිදු වූ වළක්වා ගත හැකිව තිබූ බරපතල දෝෂයක් සම්බන්ධයෙන් එල්ල වූ විවේචන හමුවේ මෙම ප්රහාරයන් උත්සන්න වී ඇති බව එම ප්රකාශය පිළිගනී. කෙසේ වෙතත්, ප්රතිපත්තිමය අඩුපාඩු ප්රශ්න කිරීමේ අයිතිය සුරකිමින්ම, අග්රාමාත්යවරියගේ පෞද්ගලිකත්වයට සහ ගරුත්වයට හානි කරමින් සංවිධානාත්මකව සිදු කරන මෙම අපහාසයන් නීත්යානුකූල විවේචනයන්ගෙන් ඔබ්බට ගිය පිළිකුල් සහගත ක්රියාවක් බව ඔවුහු අවධාරණය කරති. ලොව ප්රථම අග්රාමාත්යවරිය සහ මෙරට ප්රථම විධායක ජනාධිපතිනිය ඇතුළු ශ්රී ලංකාවේ ප්රමුඛ කාන්තා නායිකාවන් ද මෙවැනි ලිංගිකත්වය පදනම් කරගත් අපහාසයන්ට ඓතිහාසිකව මුහුණ දී ඇති බවත්, වර්තමාන ප්රහාර සඳහා ඇතැම් ආගමික නායකයින් පවා සම්බන්ධ වී තිබීම කනගාටුවට කරුණක් බවත් එහි සඳහන් වේ.අදාළ පෙළපොත් දෝෂය පිළිබඳව රජය වගකීම භාර ගැනීම සහ ඒ සම්බන්ධයෙන් පොලිස් පරීක්ෂණයක් ආරම්භ කිරීමට ගත් තීරණය නිර්මාණාත්මක පියවරක් ලෙස මෙම පිරිස අගය කරති. පාර්ලිමේන්තුව තුළ හරිනි අමරසූරිය මහත්මිය පෙන්වා දී ඇති විනයගරුක හැසිරීම, දේශපාලන විරුද්ධවාදීන්ට දක්වන ගෞරවය සහ හරවත් දේශපාලන දායකත්වය ද මෙහිදී ප්රශංසාවට ලක් කර ඇත. ප්රජාතන්ත්රවාදී සහ මානවවාදී සාරධර්ම විනාශ කරන මෙවැනි මඩ මෙහෙයුම් වහාම නතර කරන ලෙස ඉල්ලා සිටින මෙම නිවේදනය සඳහා විද්වතුන් ඇතුළු පුද්ගලයන් 58 දෙනෙකු අත්සන් තබා තිබේ.
අගමැතිනි හරිනි අමරසූරියට එරෙහි මඩ මෙහෙයුම විද්වතුන් සහ වෘත්තිකයන් දැඩි ලෙස හෙළා දකී
