අද දිනයේ දිවයිනේ බොහෝ ප්රදේශවල ප්රධාන වශයෙන් සාමකාමී කාලගුණ තත්ත්වයක් පැවතුණද, ප්රදේශ කිහිපයකට මිලිමීටර් 50 ඉක්මවූ තරමක් තද වැසි ඇතිවිය හැකි බව කාලගුණ විද්යා දෙපාර්තමේන්තුව නිවේදනය කරයි. විශේෂයෙන්ම පස්වරු 2.00 න් පමණ පසුව බස්නාහිර, සබරගමුව සහ වයඹ පළාත්වලත්, ගාල්ල, මාතර, මහනුවර සහ නුවරඑළිය දිස්ත්රික්කවලත් තැනින් තැන වැසි හෝ ගිගුරුම් සහිත වැසි ඇතිවිය හැකිය. බස්නාහිර සහ සබරගමුව පළාත්වලත්, ගාල්ල සහ මාතර දිස්ත්රික්කවලත් ඇතැම් ස්ථානවලට මිලිමීටර් 50 ට වැඩි තද වැසි බලාපොරොත්තු විය හැකි අතර, ඌව සහ නැගෙනහිර පළාත්වල ද ස්වල්ප වශයෙන් වැසි ඇතිවිය හැක. මීට අමතරව, බස්නාහිර, මධ්යම සහ සබරගමුව පළාත්වලත්, ගාල්ල, මාතර සහ කුරුණෑගල දිස්ත්රික්කවලත් උදෑසන කාලයේදී මීදුම් සහිත තත්ත්වයක් අපේක්ෂා කෙරේ.මුහුදු ප්රදේශ සම්බන්ධයෙන් සැළකීමේදී, කොළඹ සිට ගාල්ල හරහා මාතර දක්වා වන වෙරළට ඔබ්බෙන් වූ මුහුදු ප්රදේශවල සවස් කාලයේ හෝ රාත්රී කාලයේදී වැසි හෝ ගිගුරුම් සහිත වැසි ඇතිවිය හැක. සුළඟ නැගෙනහිර හෝ ඊසාන දෙසින් පැයට කිලෝමීටර් 20-30 ත් අතර වේගයකින් හමා එන අතර, දිවයින වටා වන මුහුදු ප්රදේශ සාමාන්ය ස්වභාවයක් ගනු ඇත. කෙසේ වෙතත්, ගිගුරුම් සහිත වැසි ඇති වන අවස්ථාවලදී තාවකාලිකව තද සුළං ඇති විය හැකි බැවින් සහ මුහුද රළු විය හැකි බැවින්, අකුණු මඟින් සිදුවන අනතුරු අවම කර ගැනීමට අවශ්ය පියවර ගන්නා ලෙස මහජනතාවගෙන් කාරුණිකව ඉල්ලා සිටිනු ලැබේ.
අද දිවයිනේ ප්රදේශ කිහිපයකට මිලිමීටර් 50 ඉක්මවූ වැසි!
