ශ්රී ලංකාවේ අධ්යාපන පද්ධතිය නවීකරණය කිරීම සහ මානව සම්පත් සංවර්ධනය ඉලක්ක කරගනිමින් අග්රාමාත්ය ආචාර්ය හරිනි අමරසූරිය මහත්මිය සහ ආසියානු සංවර්ධන බැංකුවේ (ADB) නිලධාරීන් අතර විශේෂ හමුවක් පසුගිය මාර්තු 02 වැනිදා අධ්යාපන අමාත්යාංශයේදී පැවැත්විණි. මෙහිදී විශේෂයෙන්ම ‘අධ්යාපනය සඳහා මානව සම්පත් සංවර්ධනය කිරීමේ ව්යාපෘතිය’ (HRDEP) පිළිබඳව අග්රාමාත්යවරිය දැනුවත් කිරීමට බැංකු නිලධාරීන් කටයුතු කළ අතර, දේශීය අධ්යාපන ක්ෂේත්රයේ ගුණාත්මක වර්ධනය උදෙසා ඉදිරියේදී ක්රියාත්මක කළ යුතු උපායමාර්ගික පියවර රැසක් මෙහිදී සාකච්ඡාවට බඳුන් විය.විශේෂයෙන්ම උසස් පෙළ අධ්යාපනයේ ප්රමිතිය ඉහළ නැංවීම, කාලීන අවශ්යතාවලට ගැලපෙන ලෙස විෂයමාලා යාවත්කාලීන කිරීම සහ අධ්යාපන ක්ෂේත්රයේ නිරත ශ්රම බලකායේ කාර්යක්ෂමතාව වර්ධනය කිරීම කෙරෙහි මෙහිදී වැඩි අවධානයක් යොමු විය. සමස්ත අධ්යාපන පද්ධතියම විධිමත් කළමනාකරණ සැලැස්මකට අනුව මෙහෙයවීම හරහා ජාතික සංවර්ධනයට සෘජුව දායක විය හැකි වෘත්තීය මට්ටමේ මානව සම්පතක් ගොඩනැගීම රජයේ මූලික අපේක්ෂාව බව අග්රාමාත්යවරිය මෙහිදී අවධාරණය කළාය.අධ්යාපන අංශය ඩිජිටල්කරණය කිරීමේ ක්රියාවලිය වේගවත් කිරීම සඳහා අවශ්ය තාක්ෂණික උපදේශන සහ කුසලතාවලින් පිරිපුන් මානව ප්රාග්ධනයක ඇති වැදගත්කම අග්රාමාත්යවරිය මෙහිදී පෙන්වා දුන්නාය. එවැනි ක්රමවත් සහ නවීන පද්ධතියක් ස්ථාපිත කිරීම තුළින් ශ්රී ලාංකේය දරු පරපුරට ජාත්යන්තර මට්ටමේ අධ්යාපන අවස්ථා උදාකර දීමට හැකිවන බව ඇය සඳහන් කළාය. රජය ක්රියාත්මක කරන මෙම පුළුල් ප්රතිසංස්කරණ වැඩපිළිවෙළ අගය කළ ආසියානු සංවර්ධන බැංකුවේ නිලධාරීන්, ඒ සඳහා අවශ්ය තාක්ෂණික සහාය මෙන්ම ජාත්යන්තර මූල්ය පහසුකම් ලබාදීමටද සිය කැමැත්ත පළ කළහ.අධ්යාපන අමාත්යාංශයේ ලේකම් නාලක කළුවැව මහතා ඇතුළු උසස් නිලධාරීන් සහ තාක්ෂණික විශේෂඥයින් පිරිසක් සහභාගී වූ මෙම සාකච්ඡාව, මෙරට අධ්යාපන ක්ෂේත්රයේ ඉදිරි පරිවර්තනය උදෙසා තැබූ තීරණාත්මක පියවරක් ලෙස සැලකේ. ජාත්යන්තර මූල්ය ආයතනයක සහයෝගය ඇතිව ක්රියාත්මක වන මෙම නව ප්රතිසංස්කරණ හරහා ශ්රී ලංකාවේ අධ්යාපන ක්ෂේත්රය තුළ වඩාත් කාර්යක්ෂම සහ ඵලදායී පද්ධතියක් ගොඩනැගීමට මග පෑදෙනු ඇත.
අධ්යාපනයේ ඩිජිටල් පුනරුදයට ADB සහය: අග්රාමාත්යවරිය සහ ආසියානු සංවර්ධන බැංකුව අතර තීරණාත්මක සාකච්ඡාවක්
