අලි-මිනිස් ගැටුම් අවම කිරීමට ජාතික ක්‍රියාකාරී සැලැස්මක් සකසන බව නීතිපති අධිකරණයට දන්වයි!

මෙරට අලි-මිනිස් ගැටුම් අවම කිරීම සඳහා බලධාරීන් විසින් ජාතික ක්‍රියාකාරී සැලැස්මක් සකස් කරමින් සිටින බව නීතිපතිවරයා ඊයේ (ඔක්තෝබර් 16) අභියාචනාධිකරණයට දන්වා සිටියේය.​අලින්ගේ ආරක්ෂාව සහ සංරක්ෂණය සහතික කිරීම සඳහා නීතිවිරෝධී විදුලි වැටවල් හඳුනාගෙන ඉවත් කිරීමට බලධාරීන්ට නියෝගයක් නිකුත් කරන ලෙස ඉල්ලා ගොනු කරන ලද රිට් පෙත්සමක් අභියාචනාධිකරණය හමුවේ කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥ ශෙමන්තී දුනුවිල මහත්මිය මෙම අදහස් පළ කළාය.​ජාතික ක්‍රියාකාරී සැලැස්මේ කෙටුම්පත් කිරීම අවසන් වූ පසු, අභියාචනාධිකරණයට එම පිටපතක් ලිඛිත ඉල්ලීමක් මගින් ඉදිරිපත් කරන බවට ඇය වැඩිදුරටත් අධිකරණයට සහතික විය.​ඒ අනුව, අභියාචනාධිකරණයේ සභාපති විශේෂඥ විනිසුරු රොහාන්ත අබේසූරිය සහ විනිසුරු කේ. ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ල විසින් පෙත්සම විභාගය ලබන වසරේ ජනවාරි 21 වැනිදාට කල් තබන ලදී. පෙත්සම්කාරිය වෙනුවෙන් ජ්‍යෙෂ්ඨ නීතිඥ සඳමාල් රාජපක්ෂ මහතා සමඟ නීතිඥ හර්ෂ මෙන්ඩිස් මහතා පෙනී සිටියේය.​ඇතුන් සහ දළ ඇතින්නන් ආරක්ෂා කිරීමේ සංගමයේ සභාපතිනිය වන කේ. ප්‍රියදර්ශනී විසින් මෙම පෙත්සම ගොනු කර ඇති අතර, එහි වනජීවී සංරක්ෂණ දෙපාර්තමේන්තුවේ අධ්‍යක්ෂ ජනරාල් එම්.ජී.සී. සූරියබණ්ඩාර, පරිසර අමාත්‍ය දම්මික පටබැඳි, ලංකා විදුලිබල මණ්ඩලයේ සභාපතිවරයා ඇතුළු තවත් කිහිප දෙනෙකු වගඋත්තරකරුවන් ලෙස නම් කර තිබේ.​පෙත්සම්කාරිය සඳහන් කළේ 2023 වසරේදී ශ්‍රී ලංකාවෙන් අලි ඇතුන් 488ක් මිය ගිය අතර, 2024 නොවැම්බර් මස අවසන් වන විට තවත් අලි ඇතුන් 354ක් මිය ගොස් ඇති බවයි. ඉන්, 2023 දී විදුලි සැර වැදීමෙන් අලි ඇතුන් 72ක් පමණ මිය ගොස් ඇති අතර, 2024 දී 49ක් එලෙසම මිය ගොස් ඇත.​තවදුරටත් පෙත්සම්කාරිය සඳහන් කළේ, කලා වැව, බලලු වැව සහ අවට කැලෑ ප්‍රදේශවල සැරිසැරූ වයස අවුරුදු 45ත් 50ත් අතර වූ “දීඝ දන්තු” නම් සුවිශේෂී දළ ඇතා 2024 නොවැම්බර් 27 වන දින පලගල, ඉඟුරු­වෙව ප්‍රදේශයේ පිහිටි දිසානායක මුදියන්සේලාගේ උපුල් ප්‍රියන්ත බණ්ඩාර මහතාට අයත් ඉඩමක මිය ගොස් සිටියදී හමු වූ බවයි. මහේස්ත්‍රාත් අධිකරණයට ඉදිරිපත් කළ වාර්තාවලට අනුව, මෙම ඇතාගේ මරණයට හේතුව වී ඇත්තේ සැකකරුගේ නිවස වටා බැටරියක් සහ අධි වෝල්ටීයතා රැහැන් භාවිතයෙන් නීතිවිරෝධී ලෙස ඉදිකරන ලද විදුලි වැටක් බවට සාක්ෂි ලැබී ඇත.​විදුලි වැටවල් වන අලින් ගම්වලට ඇතුළුවීම වැළැක්වීමේ ක්‍රියාමාර්ගයක් ලෙස භාවිත කළ හැකි වුවද, එය සැලසුම් කළ යුත්තේ ඔවුන්ට හානියක් නොවන පරිදි හෝ මරා නොදමන පරිදි පලවා හැරීමට පමණක් බව පෙත්සම්කාරිය වැඩිදුරටත් සඳහන් කර සිටියේය. මෙම සිදුවීමේදී, දළ ඇතාගේ මරණයට වගකිව යුතු පුද්ගලයා මාරාන්තික අරමුණු සඳහා නීති විරෝධී ලෙස අධි වෝල්ටීයතා ධාරාවක් භාවිත කර ඇති බවද ඇය පෙන්වා දුන්නාය.