අස්වැසුම සුබසාධන ප්රතිලාභ ක්රමය වඩාත් ඵලදායී කිරීම සඳහා සුදුස්සන් තේරීමේ දැනට පවතින නිර්ණායක සංශෝධනය කරන ලෙස රජයේ මුදල් පිළිබඳ කාරක සභාව (COPF) සුබසාධක ප්රතිලාභ මණ්ඩලයට උපදෙස් දී ඇත. දැනට භාවිත වන නිර්ණායක 22 සම්බන්ධයෙන් විවිධ ගැටලු පැන නැගී ඇති බැවින්, ඉදිරියේදී ප්රතිලාභීන් තේරීමේදී නව නිර්ණායක හඳුන්වා දීමට පියවර ගන්නා ලෙස කාරක සභාව දැනුම් දුන්නේය. මේ අතර, සමෘද්ධි සංවර්ධන දෙපාර්තමේන්තුවේ පරිපාලන කටයුතු සහ වැටුප් ගෙවීම සඳහා වාර්ෂිකව රුපියල් බිලියන 22කට අධික මුදලක් වැය කිරීම පිළිබඳවද කාරක සභාවේ දැඩි අවධානය යොමු විය. 2026 වසර සඳහා වැටුප් සහ බලගැන්වීමේ කටයුතු වෙනුවෙන් රුපියල් බිලියන 27.38ක මුදලක් වෙන් කර ඇති බව එහිදී අනාවරණය විය.අස්වැසුම ක්රමය යටතේ ‘සංක්රාන්තික’ කාණ්ඩයේ ප්රතිලාභ ගෙවීම් 2025 අප්රේල් 30 දිනෙන් අවසන් වූ බවත්, යෝජිත නව සංශෝධන යටතේ අනතුරට ලක්විය හැකි, දිළිඳු සහ අන්ත දිළිඳු කාණ්ඩ සඳහා ගෙවීම් සිදු කරන බවත් නිලධාරීහු ප්රකාශ කළහ. කෙසේ වෙතත්, ඇති විය හැකි ආර්ථික හා සමාජීය බලපෑම් සලකා බලා, 2025 දෙසැම්බර් 31 දිනෙන් අවසන් වීමට නියමිතව තිබූ ‘අනතුරට ලක්විය හැකි’ (Vulnerable) කාණ්ඩයේ ගෙවීම් 2026 ජූනි දක්වා දීර්ඝ කිරීමට යෝජනා වී ඇත. මීට අමතරව ආබාධිත, වකුගඩු ආධාර සහ වැඩිහිටි දීමනා අඛණ්ඩව ලබා දෙන බවද මෙහිදී සඳහන් විය.රජයේ මුදල් පිළිබඳ කාරක සභාවේ සභාපති ආචාර්ය හර්ෂ ද සිල්වා මහතා මෙහිදී ප්රශ්න කළේ, සමෘද්ධි දෙපාර්තමේන්තුව සිදු කරන බලගැන්වීමේ කටයුතුවලට සාපේක්ෂව පරිපාලන වියදම් සහ වැටුප් සඳහා මෙතරම් විශාල මුදලක් වෙන් කිරීම කොතරම් දුරට ප්රායෝගිකද යන්නයි. එම දෙපාර්තමේන්තුව මගින් ක්රියාත්මක කරන ප්රජා සංවර්ධන ව්යාපෘති පිළිබඳව මෙතෙක් කිසිදු ස්වාධීන ඇගයීමක් සිදු කර නොමැති බව අනාවරණය වීමත් සමඟ, සමෘද්ධි දෙපාර්තමේන්තුව සහ අනෙකුත් සියලුම සුබසාධන ව්යාපෘති පිළිබඳ ස්වාධීන ඇගයීමක් සිදු කරන ලෙස කාරක සභාව මුදල් අමාත්යාංශයට නිර්දේශ කළේය.
අස්වැසුම ප්රතිලාභීන්ට අලුත් නිර්ණායක: සමෘද්ධි දෙපාර්තමේන්තුවේ වැටුප් වියදම් ගැනත් COPF ප්රශ්න කරයි!
