අස්වැසුම සමාජ ආරක්ෂණ වැඩසටහන සඳහා සුදුසුකම් ලත් ප්‍රතිලාභීන් තෝරා ගැනීමේදී යාවත්කාලීන සහ නිවැරදි දත්ත පද්ධතියක් පවත්වාගෙන යාම අත්‍යවශ්‍ය බව ලෝක බැංකු නියෝජිතයින් අවධාරණය කර ඇත.මෙම අරමුණ සඳහා අවශ්‍ය තාක්ෂණික සහාය සහ ජාත්‍යන්තර විශේෂඥ දැනුම ලබා දීමට තම සූදානම ද ඔවුහු වැඩිදුරටත් ප්‍රකාශ කළහ.මුදල්, සැලසුම් හා ආර්ථික සංවර්ධනය පිළිබඳ අමාත්‍ය උපදේශක කාරක සභාවේ සාමාජිකයින්, ආර්ථික සංවර්ධනය සහ ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සාමාජිකයින්, අනෙකුත් පාර්ලිමේන්තු මන්ත්‍රීවරුන්, ලෝක බැංකු නියෝජිතයින් සහ මුදල්, ආර්ථික ස්ථායීකරණ හා ජාතික ප්‍රතිපත්ති අමාත්‍යාංශයේ නිලධාරීන් සහභාගී වූ ඒකාබද්ධ රැස්වීමකදී මෙම අදහස් මතු වී ඇත.මෙම රැස්වීම ග්‍රාමීය සංවර්ධන, සමාජ සවිබලගැන්වීම් සහ සුබසාධන අමාත්‍ය උපාලි පන්නිලගේ සහ ආර්ථික සංවර්ධන හා ජාත්‍යන්තර සබඳතා පිළිබඳ ආංශික අධීක්ෂණ කාරක සභාවේ සභාපතිනී ලක්මාලි හේමචන්ද්‍ර යන මහත්ම මහත්මීන්ගේ සහභාගීත්වයෙන් මෑතකදී පාර්ලිමේන්තුවේදී පැවැත්විණි. ලෝක බැංකු දූත පිරිසට සමාජ ආරක්ෂණ ව්‍යාපෘතියේ ජ්‍යෙෂ්ඨ ආර්ථික විද්‍යාඥවරිය වන ෆ්‍රැන්චෙස්කා ලමන්නා (Ms. Francesca Lamanna), ජ්‍යෙෂ්ඨ සමාජ ආරක්ෂණ විශේෂඥ ශ්‍රීනිවාස් වරදන් (Srinivas Varadan) සහ තවත් කිහිප දෙනෙක් ඇතුළත් විය.සාකච්ඡා අතරතුර, සමාජ ආරක්ෂණය සඳහා පුළුල් දත්ත පද්ධතියක් ස්ථාපිත කිරීම මගින් සැබවින්ම දුප්පත් හා අවදානමට ලක් වූ පුද්ගලයින් සහ පවුල් නිවැරදිව හඳුනා ගැනීමට හැකි වන බව ලෝක බැංකු නියෝජිතයින් ප්‍රකාශ කළහ.දත්ත ගබඩාවට පුරවැසියන්ගේ තොරතුරු ඇතුළත් කිරීම පමණක් ස්වයංක්‍රීයව ඔවුන් අස්වැසුම ප්‍රතිලාභීන් ලෙස සුදුසුකම් නොලබන බව ඔවුහු පෙන්වා දුන්හ. ඒ වෙනුවට, අදාළ ප්‍රතිලාභ සඳහා සුදුසුකම් ලබන්නන් නිවැරදිව හඳුනා ගැනීම සඳහා දත්ත තහවුරු කර විශ්ලේෂණය කළ යුතු බව ද ඔවුහු සඳහන් කළහ.එවැනි සමාජ ආරක්ෂණ දත්ත පද්ධතියක් රටට ඵලදායී ආයෝජනයක් වන බවත්, එබැවින් දත්ත පද්ධතිය අඛණ්ඩව යාවත්කාලීන කිරීමේ අවශ්‍යතාවයත් ඔවුහු වැඩිදුරටත් අවධාරණය කළහ.සාකච්ඡාවට සහභාගී වූ පාර්ලිමේන්තු මන්ත්‍රීවරුන් ද අස්වැසුම ප්‍රතිලාභ බෙදා හැරීමේදී මතුවන ගැටළු සම්බන්ධයෙන් අදහස් පළ කළහ.ක්‍රියාවලියේ විනිවිදභාවය සහතික කිරීම සඳහා ප්‍රාදේශීය කමිටු මගින් ප්‍රතිලාභීන් තෝරා ගත යුතු බවත්, තෝරාගත් ප්‍රතිලාභීන්ගේ ලැයිස්තුව අදාළ ගම්මානය තුළ ප්‍රසිද්ධියේ ප්‍රදර්ශනය කළ යුතු බවත් ඔවුහු යෝජනා කළහ.අස්වැසුම වැඩසටහන ක්‍රියාත්මක කිරීම සම්බන්ධ නිලධාරීන් ප්‍රකාශ කළේ, ක්‍රියාත්මක කිරීමේ නිලධාරීන්ට, ප්‍රාදේශීය ලේකම්වරුන්ට සහ ග්‍රාම නිලධාරීන්ට ප්‍රමාණවත් තොරතුරු නොලැබීම හේතුවෙන් යම් යම් අභියෝග මතු වී ඇති බවයි. කෙසේ වෙතත්, වැඩසටහන සාර්ථකව ක්‍රියාත්මක කිරීම සහතික කිරීම සඳහා ඔවුන්ගේ අදාළ භූමිකාවන් පිළිබඳව මෙම නිලධාරීන් දැනුවත් කිරීමට සහ ඔවුන්ගේ සහයෝගය ලබා ගැනීමට දැනට පියවර ගනිමින් සිටින බව ද ඔවුහු සඳහන් කළහ.
‘අස්වැසුම’ සඳහා නිවැරදි දත්ත පද්ධතියක් අත්‍යවශ්‍යයි! – ලෝක බැංකුවෙන් අවධාරණය
