ශ්‍රී ලංකා ක්‍රිකට් (SLC) ආයතනය විසින් ජාතික පිරිමි කණ්ඩායමේ පවතින එක්දින ක්‍රිකට් තරඟාවලිය සහ ඉදිරියේ පැවැත්වීමට නියමිත පකිස්තානයට එරෙහි විස්සයි-20 තුන්කොන් තරඟාවලිය සඳහා වන සංශෝධිත කාලසටහන නිවේදනය කර ඇත. SLC පවසන පරිදි, මේ වන විට පාකිස්තානයේ සංචාරය කරමින් සිටින ක්‍රීඩකයන් 16 දෙනෙකුගෙන් යුත් ජාතික කණ්ඩායම, කණ්ඩායම් කළමනාකාරීත්වය සහ සහාය කාර්ය මණ්ඩලය සංචාරය දිගටම කරගෙන යාමට තීරණය කර ඇත. මෙම තීරණයට එළඹීමට පෙර, ශ්‍රී ලංකා ක්‍රිකට් ආයතනය, පාකිස්තාන ක්‍රිකට් මණ්ඩලය (PCB) සහ අදාළ බලධාරීන් සමඟ සමීපව සාකච්ඡා කර, සංචාරක කණ්ඩායමේ සෑම සාමාජිකයෙකුගේම ආරක්ෂාව සහ යහපැවැත්ම සහතික කරන බවට ප්‍රතිඥා ලබා දී තිබුණි. ඒ අනුව, ක්‍රීඩකයන්, කණ්ඩායම් කළමනාකාරීත්වය සහ සහාය කාර්ය මණ්ඩලය පවතින එක්දින තරඟාවලියට සහ ඉදිරියේ පැවැත්වීමට නියමිත විස්සයි-20 තුන්කොන් තරඟාවලියට සහභාගී වීම සඳහා පාකිස්තානයේ රැඳී සිටිනු ඇත. මීට පෙර, ඉස්ලාමාබාද්හි සිදුවූ මෑතකාලීන මරාගෙන මැරෙන බෝම්බ ප්‍රහාරයක් හේතුවෙන් ඇති වූ ආරක්ෂක ගැටලු මත ශ්‍රී ලංකා ක්‍රීඩකයින් සිය කනස්සල්ල පළ කරමින් වහාම ආපසු කැඳවීමක් ඉල්ලා තිබුණි. ඊට ප්‍රතිචාර ලෙස, පාකිස්තාන ක්‍රිකට් මණ්ඩලයේ සභාපති මොහ්සින් නක්වි මහතා, (ඔහු එරට අතුරු වැඩබලන අභ්‍යන්තර කටයුතු අමාත්‍යවරයා ද වේ) ශ්‍රී ලංකා ක්‍රීඩකයන් හමුවී, ඔවුන්ගේ කනස්සල්ලට පිළිතුරු ලබා දී පාකිස්තානයේ ආරක්ෂක කැපවීම් නැවත තහවුරු කළේය.
ආරක්ෂක සහතික මත ශ්‍රී ලංකා කණ්ඩායම පාකිස්තාන සංචාරයේ රැඳී සිටීමට තීරණය කරයි
