ශ්රී ලංකාව ක්රියාත්මක කළ ප්රතිසංස්කරණ වැඩපිළිවෙළ හේතුවෙන් ශක්තිමත් ආර්ථික පිබිදීමක්, මිල ස්ථායීතාවක් සහ විදේශ විනිමය සංචිත යළි ගොඩනැගීමේ ප්රගතියක් අත්කරගෙන තිබුණද, ආර්ථිකය තවමත් අවදානම් සහගත මට්ටමක පවතින බව ජාත්යන්තර මූල්ය අරමුදල (IMF) පවසයි. පසුගිය සිකුරාදා නිවේදනයක් නිකුත් කරමින් එහි නියෝජ්ය කළමනාකාර අධ්යක්ෂ කෙන්ජි ඔකමුරා මහතා පෙන්වා දුන්නේ, දළ දේශීය නිෂ්පාදිතය තවමත් අර්බුදයට පෙර පැවති මට්ටමට පැමිණ නොමැති බවයි. මෑතකදී ශ්රී ලංකාවට බලපෑ විනාශකාරී සුළි කුණාටුව හේතුවෙන් 600කට අධික පිරිසක් මියගොස් මිලියන සංඛ්යාත ජනතාවක් පීඩාවට පත්වීම නිසා රටේ ආර්ථිකයට සහ ගෙවුම් ශේෂයට දැඩි පීඩනයක් එල්ල වී ඇති බවද ඔහු සඳහන් කළේය.මෙම ආපදා තත්ත්වය හමුවේ මතුව ඇති මානුෂීය සහ ප්රතිසංස්කරණ අවශ්යතා සපුරාලීම සඳහා ජාත්යන්තර මූල්ය අරමුදලේ ‘හදිසි මූල්ය සහාය’ (RFI) මෙවලම යටතේ මූල්ය පහසුකම් ලබාදීමට පියවර ගෙන ඇත. 2025 වසරේදී පෙන්නුම් කළ ශක්තිමත් මූල්ය අතිරික්තය හේතුවෙන් සහන පියවර රැසක් කඩිනමින් ක්රියාත්මක කිරීමට රජයට හැකි වූ අතර, අවශ්ය වුවහොත් මූල්ය පද්ධතියට ද්රවශීලතා සහාය ලබා දීමට ශ්රී ලංකා මහ බැංකුව සූදානමින් සිටින බවද ඔකමුරා මහතා පැවසීය.ප්රතිසංස්කරණ කටයුතු සඳහා විශාල පිරිවැයක් දැරීමට සිදුවුවද, රාජ්ය මූල්ය හා ණය තිරසාරභාවය ආරක්ෂා කර ගැනීම සඳහා රජය කැපවී සිටින බව ජාත්යන්තර මූල්ය අරමුදල පවසයි. සියලුම හදිසි වියදම් රාජ්ය මූල්ය කළමනාකරණ පනතට අනුකූලව විනිවිදභාවයකින් යුතුව සිදුකිරීමට නියමිත අතර, අයවැය හිඟය පියවා ගැනීමට මහ බැංකුවෙන් මුදල් මුද්රණය නොකිරීමට ද එකඟතාව පළ කර ඇත. ශ්රී ලංකාව දැඩි ආර්ථික අර්බුදයකින් මිදී ගොඩ එමින් සිටින මොහොතක මෙම ස්වභාවික විපත්තිය සිදුවූ බවත්, මේ දුෂ්කර අවස්ථාවේ ශ්රී ලාංකික ජනතාව සමඟ සිටිමින් රට ගොඩනැගීමේ උත්සාහයට අඛණ්ඩව සහාය දෙන බවත් IMF නියෝජිතයා වැඩිදුරටත් අවධාරණය කළේය.
ආර්ථිකය යථා තත්ත්වයට එද්දී සුළි කුණාටුවෙන් දැඩි බලපෑමක් – ජාත්යන්තර මූල්ය අරමුදලෙන් හදිසි සහාය!
