ඇමරිකාවෙන් H5N5 පක්ෂි උණේ පළමු මිනිස් ආසාදිතයා වාර්තා වෙයි!

සතුන්ගෙන් මීට පෙර වාර්තා වී තිබුණත් කිසිදා මිනිසුන් තුළ දක්නට නොලැබුණු පක්ෂි උණ වෛරස ප්‍රභේදයකින් ආසාදිත පළමු ඇමරිකානු රෝගියා වාර්තා වූ බව වොෂින්ටන් ප්‍රාන්තයේ සෞඛ්‍ය නිලධාරීන් පසුගිය සිකුරාදා (නොවැම්බර් 14) තහවුරු කළේය. වසංගත රෝග පාලන මධ්‍යස්ථානය (CDC) සහ ප්‍රාන්ත සෞඛ්‍ය නිලධාරීන් කියා සිටින්නේ මහජනයාට ඇති අවදානම අඩු බවයි. නිලධාරීන්ට අනුව, යටින් පවතින රෝගී තත්ත්වයන් සහිත වැඩිහිටි පුද්ගලයෙකුට මූලික වශයෙන් ආසාදනය තහවුරු වී ඇති අතර ඔහු නොවැම්බර් මස මුල සිට රෝහල් ගතව සිටී. එම පුද්ගලයාට අධික උණ, ව්‍යාකූලත්වය සහ ශ්වසන අපහසුතා ඇති වූ බවත්, ප්‍රාන්ත වසංගත රෝග විද්‍යාඥ ස්කොට් ලින්ඩ්ක්විස්ට් මහතා “දරුණු ලෙස රෝගාතුර වූ රෝගියෙක්” යනුවෙන් පැහැදිලි කළේය. මෙම රෝගියාට සතුන් තුළ වාර්තා වී තිබූ නමුත් මිනිසුන් තුළ කිසිදා වාර්තා නොවූ H5N5 නම් පක්ෂි උණ වෛරසය ආසාදනය වී ඇති බව නිලධාරීන් තහවුරු කළේය. මෙම H5N5 වෛරසය මීට පෙර අනෙකුත් ඇමරිකානු ප්‍රාන්තවල සහ කැනඩාවේ වන සතුන් තුළ දක්නට ලැබී ඇත. කෙසේ වෙතත්, මෙය ලොව පුරා සතුන් හා මිනිසුන් තුළ බහුලව දක්නට ලැබෙන H5N1 ප්‍රභේදයෙන් වෙනස් වේ. වොෂින්ටන් ප්‍රාන්තයේ සෞඛ්‍ය නිලධාරී ටාඕ ක්වාන්-ගෙට් පැවසුවේ H5N5 ආසාදනය වැදගත් විද්‍යාත්මක හා වසංගත රෝග විද්‍යාත්මක සොයාගැනීමක් වුවත්, “නව තොරතුරු මගින් පරීක්ෂණය, මහජන සෞඛ්‍ය ප්‍රතිචාරය හෝ මහජනතාවට දෙන මඟපෙන්වීම වෙනස් නොකරන” බවයි. නිලධාරීන් පැවසුවේ සෞඛ්‍ය සේවකයින් 100 කට වැඩි පිරිසක් ඇතුළුව රෝගියා සමඟ සම්බන්ධතා පැවැත්වූ සියලු දෙනා රෝග ලක්ෂණ සඳහා නිරීක්ෂණය කර ඇති බවත්, “H5N5 ආසාදනය වූ රෝගියා හැර වෙනත් කිසිදු පුද්ගලයෙකු හඳුනාගෙන නොමැත” බවත් ක්වාන්-ගෙට් මහතා තහවුරු කළේය. මෙම රෝගියා ගේ නිවසේ සිටි කුකුළු රංචුවක සිටි පක්ෂීන් දෙදෙනෙකු සති කිහිපයකට පෙර රෝගී තත්ත්වයකින් මිය ගොස් ඇති බව පශු වෛද්‍යවරියක් පැවසුවාය. දැනට ඇමරිකා එක්සත් ජනපදයේ පක්ෂි උණ මිනිසෙකුගෙන්-මිනිසෙකුට පැතිරීමක් වාර්තා වී නොමැති නමුත්, ආසාදිත පක්ෂීන් හෝ වෙනත් සතුන් සමඟ සම්බන්ධ වන පුද්ගලයින්ට ආසාදනය වීමේ වැඩි අවදානමක් ඇත. එක්සත් ජනපදයේ 2024-2025 දී මිනිසුන් තුළ වාර්තා වූ ආසාදන 70 න් බොහොමයක් ආසාදිත කිරි ගවයන් හෝ කුකුළු සතුන් සමඟ සම්බන්ධ වූ කම්කරුවන් අතර විය. එසේම, සංක්‍රමණික පක්ෂීන් මගින් වෛරසය ගෘහස්ථ සතුන් වෙත ව්‍යාප්ත කිරීමේ හැකියාව නිසා සරත් සෘතුවේ සහ ශීත ඍතුවේ දී පක්ෂි උණ අවදානම වැඩි වන බව විශේෂඥයෝ පවසති. ඇමරිකාවේ අවධානයට ලක්වන එකම සත්ව රෝගය පක්ෂි උණ නොවන අතර, මධ්‍යම ඇමරිකාවේ පැතිර යන New World Screwworm වැනි පරපෝෂිතයන් සහ අප්‍රිකානු ඌරු උණ (African swine fever) පිළිබඳව ද සෞඛ්‍ය නිලධාරීන් අවධානයෙන් සිටී.