ඇමරිකානු එක්සත් ජනපද රජය විසින් බෙල් හෙලිකොප්ටර් ටෙක්ස්ට්රොන් (Bell Helicopter Textron USA) සමාගම නිෂ්පාදනය කරන ලද, ලොව සුප්රකට බෙල් 206B-3 මාදිලියට සමාන යුදමය හැකියාවන්ගෙන් යුත් ‘TH-57 සී රේන්ජර්’ (TH-57 Sea Ranger) වර්ගයේ හෙලිකොප්ටර් දහයක් ශ්රී ලංකාවට පරිත්යාග කර ඇත. වොෂින්ටන් ඩී.සී. හි පිහිටි ශ්රී ලංකා තානාපති කාර්යාලයට අනුව, දැනට අවසන් අදියරේ පවතින මෙම හෙලිකොප්ටර් පෙබරවාරි මස මුලදී ශ්රී ලංකාව බලා නැව්ගත කිරීමට නියමිතය. මෙමගින් ශ්රී ලංකා ගුවන් හමුදාව දීර්ඝ කාලයක සිට මුහුණ දුන් මෙහෙයුම් අවශ්යතාවයක් සපිරෙන අතර, විවිධ පොදු කාර්ය මෙහෙයුම් සඳහා ගුවන් හමුදා බලඇණිය තවදුරටත් ශක්තිමත් වනු ඇත.1968 වසරේ සිට ඇමරිකානු නාවික, මැරීන් සහ වෙරළාරක්ෂක බලකායන්හි සේවය කර ඇති මෙම හෙලිකොප්ටර් මාදිලිය එහි විශ්වාසනීයත්වය සහ බහුවිධ හැකියාවන් සම්බන්ධයෙන් ජාත්යන්තර කීර්තියක් උසුලයි. විශේෂයෙන්ම උසස් නියමු පුහුණුව, මගී ප්රවාහනය, ආපදා සහන සේවා, සමුද්රීය සෝදිසි කිරීම් සහ මුදාගැනීම් මෙන්ම මානුෂීය මෙහෙයුම් සඳහා මෙම යානා බෙහෙවින් උපකාරී වේ. 1969 වසරේ සිටම බෙල් 206 හෙලිකොප්ටර් මෙහෙයවන ශ්රී ලංකා ගුවන් හමුදාවට මෙම නව යානා සිය යටිතල පහසුකම් හා විශේෂඥ දැනුම සමඟ පහසුවෙන් ඒකාබද්ධ කරගැනීමේ හැකියාව පවතී.මෙම පරිත්යාගයේ ඇති මූලෝපායික වැදගත්කම පිළිබඳව අදහස් දැක්වූ ඇමරිකානු යුද දෙපාර්තමේන්තුවේ නියෝජ්ය සහකාර අධ්යක්ෂ ආචාර්ය ඇන්ඩෘ බයර්ස් මහතා ප්රකාශ කළේ, මීට පෙර ලබාදුන් වෙරළාරක්ෂක නෞකාව මෙන්ම ‘දිට්වා’ සුළි කුණාටුවෙන් පසුව ලබාදුන් සහන සේවා මෙන්ම මෙයද දෙරටේ ආරක්ෂක සබඳතාවල තීරණාත්මක පියවරක් බවයි. කලාපීය ආරක්ෂාව, ආපදා සූදානම සහ මානුෂීය ආධාර සැපයීමේදී ඇමරිකාව සහ ශ්රී ලංකාව අතර පවතින ශක්තිමත් හවුල්කාරිත්වය මෙමගින් තහවුරු වන බව තානාපති කාර්යාලය අවධාරණය කරයි. මෙම යානා එක්වීමත් සමඟ ශ්රී ලංකාවේ හදිසි ප්රතිචාර දැක්වීමේ සහ මානුෂීය ආධාර බෙදාහැරීමේ හැකියාව සැලකිය යුතු ලෙස ඉහළ යනු ඇත.
ඇමරිකාවෙන් ශ්රී ලංකාවට ප්රබල හෙලිකොප්ටර්
