නිල සංචාරයක් සඳහා දිවයිනට පැමිණ සිටින ඉන්දීය විදේශ කටයුතු අමාත්ය එස්. ජයශංකර් මහතා අද (දෙසැම්බර් 23) අරලියගහ මන්දිරයේදී අග්රාමාත්ය හරිනි අමරසූරිය මහත්මිය හමුවිය. ඉන්දීය අග්රාමාත්ය නරේන්ද්ර මෝදි මහතාගේ විශේෂ නියෝජිතයෙකු ලෙස පැමිණි ඒ මහතා, සුළි කුණාටුවෙන් සිදු වූ විනාශයෙන් පසු ශ්රී ලංකාව යළි ගොඩනැගීමේ උත්සාහයන් ආරම්භ කර ඇති මොහොතක මෙරට ඉහළ පෙළේ නායකත්වය සමඟ සාකච්ඡා පැවැත්වීය. එහිදී දුම්රිය මාර්ග, පාලම් ප්රතිසංස්කරණය සහ කෘෂිකාර්මික අංශය ශක්තිමත් කිරීම ඇතුළුව ශ්රී ලංකාවට අවශ්ය ඕනෑම සහයෝගයක් ලබාදීමට ඉන්දියාව සූදානම් බව අමාත්යවරයා යළි තහවුරු කළේය. එමෙන්ම ශක්තිමත් ව්යවස්ථාදායක සහ පරිපාලනමය රාමුවක් සහිතව ආපදා අවස්ථාවලට මුහුණ දීමේ ක්රමවේදයක වැදගත්කම ද ඔහු පෙන්වා දුන්නේය.දෙපාර්ශවය අතර පැවති මෙම සාකච්ඡාවේදී වත්මන් සහන සේවා කටයුතු සමාලෝචනය කළ අතර ආපදා ප්රතිචාර සහ යථා තත්ත්වයට පත් කිරීමේ ක්රියාවලිය තුළ දෙරටේ සහයෝගීතාව තවදුරටත් ශක්තිමත් කිරීම පිළිබඳව ද අවධානය යොමු විය. ඉන්දියාව ලබාදෙන අඛණ්ඩ සහයෝගය අගය කළ අග්රාමාත්ය හරිනි අමරසූරිය මහත්මිය, සුළි කුණාටු විපත්තියෙන් පසු සිදු කෙරෙන ප්රකෘතිමත් කිරීමේ ක්රියාවලිය හුදෙක් සහන සැලසීමට පමණක් සීමා නොවී, ජනාවාස සහ යටිතල පහසුකම් ප්රතිසංස්කරණය කිරීම වැනි දිගුකාලීන පියවර දක්වා විහිදෙන බව සඳහන් කළාය.සාමාන්ය ජන ජීවිතය යථා තත්ත්වයට පත් කිරීමේ පියවරක් ලෙස පාසල් යළි විවෘත කිරීමට පියවර ගෙන ඇති බවත්, ඒ පිළිබඳව සමීපව නිරීක්ෂණය කරන බවත් අග්රාමාත්යවරිය මෙහිදී පැවසුවාය. ආපදා අවස්ථාවේදී ශ්රී ලාංකික ජනතාව දැක්වූ සාමුහිකත්වය සහ ස්වේච්ඡා කැපවීම අගය කළ ඇය, රටේ ස්ථාවරත්වය තහවුරු කිරීමේ සහ ආරක්ෂණ යාන්ත්රණයන් ශක්තිමත් කිරීමේ අවශ්යතාව ද අවධාරණය කළාය. මෙම අවස්ථාවට ඉන්දීය මහ කොමසාරිස් සන්තෝෂ් ජා මහතා ඇතුළු ඉන්දීය දූත පිරිසක් සහ අග්රාමාත්ය ලේකම් ප්රදීප් සපුතන්ත්රි මහතා ඇතුළු ශ්රී ලාංකික නියෝජිත පිරිසක් එක්ව සිටියහ.
ඉන්දීය විදේශ අමාත්ය එස්. ජයශංකර් මහතා සහ අගමැතිනි හරිනි අමරසූරිය මහත්මිය අතර හමුවක්!
