ඉන්දියාවේ නිල සංචාරයක නිරතව සිටින අග්‍රාමාත්‍ය ආචාර්ය හරිනි අමරසූරිය මහත්මියගේ අධ්‍යයන හා රාජ්‍ය සේවා ජයග්‍රහණ ඇගයීමක් ලෙස, ඇය සිය උපාධිය හදාරන ලද දිල්ලි විශ්ව විද්‍යාලයේ (University of Delhi) හින්දු විද්‍යාලය (Hindu College) මගින් නව පර්යේෂණ පහසුකමක් විවෘත කර ඇත. “හරිනි අමරසූරිය සමාජ හා ජනවාර්ගික පර්යේෂණාගාරය” (“Harini Amarasuriya Social & Ethnographic Research Lab”) ලෙස නම් කර ඇති මෙම පහසුකම ඇගේ උසස් අධ්‍යාපන ගමනට හිමිවන ගෞරවයකි. අග්‍රාමාත්‍යවරිය සිය අධ්‍යාපන ආයතනය වෙත පැමිණි අවස්ථාවේදී විද්‍යාලයේ පරිපාලනය, කථිකාචාර්යවරුන් සහ සිසුන් විසින් ඇයව උණුසුම් ලෙස පිළිගනු ලැබීය.සිය අධ්‍යාපන කටයුතු සිදු කළ පන්ති කාමර නැවත නැරඹූ ආචාර්ය අමරසූරිය මහත්මිය, හින්දු විද්‍යාලයෙන් ලද අධ්‍යාපනය ඇගේ අධ්‍යයන ගමනට මෙන්ම සමාජ සාධාරණත්වය, සමානතාවය සහ අධ්‍යාපන ප්‍රතිසංස්කරණ සඳහා වූ ඇයගේ කැපවීම කෙරෙහි බලපෑ ආකාරය පිළිබඳව සිහිපත් කළාය. සිසුන් අමතමින් ඇය අවධාරණය කළේ, “අධ්‍යාපනය යනු හුදෙක් පුද්ගල අනාගතය සුරක්ෂිත කිරීමක් නොව, අන් අයගේ අනාගතය පරිවර්තනය කිරීමට අප සන්නද්ධ කිරීමක්” බවයි. ඇය වැඩිදුරටත්, සියල්ලන්ම ඇතුළත් වන හා සාධාරණ සමාජයක් ගොඩනැගීම සඳහා කුතුහලය, සංවේදනය, විවේචනාත්මක චින්තනය, අනුකම්පාව, ප්‍රජාතන්ත්‍රවාදය සහ ක්‍රියාකාරී පුරවැසිභාවය යන කරුණු වල ඇති වැදගත්කම අවධාරණය කළාය.හින්දු විද්‍යාලයේ සංචාරයෙන් අනතුරුව, අග්‍රාමාත්‍යවරිය ඉන්දියාවේ ප්‍රමුඛතම ප්‍රතිපත්ති සම්පාදන ආයතනය වන “NITI Aayog” වෙත ගොස් ඇත. එහිදී පැවති සාකච්ඡා අධ්‍යාපන ප්‍රතිසංස්කරණ, නවෝත්පාදනය සහ පාලනය කෙරෙහි අවධානය යොමු විය. ශ්‍රී ලංකාව ද මේ වන විට අධ්‍යාපන ප්‍රතිසංස්කරණ න්‍යාය පත්‍රයක් ඉදිරියට ගෙන යන බැවින්, පර්යේෂණ, නිර්මාණශීලිත්වය සහ ඩිජිටල් ඉගෙනුම් ප්‍රවර්ධනය කිරීම සඳහා ඉන්දියාවේ ප්‍රවේශය සහ “Atal Innovation Mission” වැනි වැඩසටහන් ඇතුළු ඉන්දියාවේ පරිවර්තනීය අත්දැකීම් පිළිබඳව මෙම හමුවේදී විශේෂයෙන් අවධානය යොමු විය.
ඉන්දීය විශ්ව විද්‍යාලයකින් අගමැති ආචාර්ය හරිනි අමරසූරියට සුවිශේෂී ගෞරවයක්!
