මෙවර වෙළඳ සේවා ක්රිකට් සංගමය (MCA) විසින් සංවිධානය කරනු ලබන 2026 ‘F’ කාණ්ඩයේ පන්දුවාර විස්ස ලීග් ක්රිකට් තරගාවලිය උද්යෝගිමත් අයුරින් ආරම්භ වී ඇත. කණ්ඩායම් 24ක සහභාගීත්වයෙන් පැවැත්වෙන මෙම තරගාවලිය සඳහා මෙවරත් නිල අනුග්රහය ලබා දෙන්නේ ෆෙයාර්ෆස්ට් රක්ෂණ සමාගමයි (Fairfirst Insurance). මේ පිළිබඳ නිල දැනුවත් කිරීම සහ අනුග්රහක පත්රිකා ප්රදානය කිරීමේ මාධ්ය හමුව MCA ශ්රවණාගාරයේදී පවත්වන ලද අතර, ඒ සඳහා ෆෙයාර්ෆස්ට් රක්ෂණ සමාගමේ ප්රධාන විධායක නිලධාරී රවිසංක විග්නේෂ්වරම් මහතා සහ වෙළඳ සේවා ක්රිකට් සංගමයේ සභාපති ශිරෝෂ ගුණතිලක මහතා ඇතුළු නිලධාරීන් පිරිසක් එක්ව සිටියහ.තරගාවලියේ ව්යුහය අනුව කණ්ඩායම් 24ක් කාණ්ඩ හතරක් යටතේ තරග වදින අතර, සෑම කාණ්ඩයකටම කණ්ඩායම් හයක් ඇතුළත් වේ. ජනවාරි 15 වැනිදා ආරම්භ වූ මෙම තරගාවලිය ප්රධාන අදියර දෙකකින් සමන්විතය. පළමු අදියරේදී ලීග් ක්රමය යටතේ තරග 60ක් පැවැත්වෙන අතර, ඉන් අනතුරුව දෙවන අදියරේ තීරණාත්මක තරග 15ක් පැවැත්වීමට නියමිතය. මෙම වටයන්ගෙන් පසුව වඩාත් උණුසුම් මුහුණුවරක් ගන්නා පිළිමලුන් පිටුදැකීමේ (Knockout) වටය ආරම්භ වීමට නියමිතව ඇත.අවසන් මහා තරගය දක්වා දිවෙන තීරණාත්මක කාලසටහනට අනුව, අර්ධ අවසන් පූර්ව තරග පෙබරවාරි 28 වැනිදා පැවැත්වූ අතර, අවසන් පූර්ව තරග මාර්තු මස 07 වැනිදා පැවැත්වීමට කටයුතු යොදා ඇත. මෙවර තරගාවලියේ ශූරයන් තීරණය කෙරෙන උද්වේගකර අවසන් මහා තරගය මාර්තු මස 14 වැනිදා පැවැත්වීමට සියලු කටයුතු සූදානම් කර තිබේ. ක්රීඩකයන්ගේ දක්ෂතා ඇගයීම වෙනුවෙන් තරගාවලිය පුරා කැපී පෙනෙන දස්කම් දක්වන පිතිකරුවන්ට සහ පන්දු යවන්නන්ට මෙන්ම, තරගාවලියේ වීරයා සහ අවසන් තරගයේ වීරයා සඳහා විශේෂ තෑගි පිරිනැමීමට ද සංවිධායක මණ්ඩලය සැලසුම් කර ඇත.මෙම මාධ්ය හමුවේදී අදහස් දැක්වූ ෆෙයාර්ෆස්ට් රක්ෂණ සමාගමේ සහ MCA බලධාරීන් අවධාරණය කළේ, වෙළඳ සේවා ක්ෂේත්රයේ ක්රීඩා කෞශල්යය ඔප්නැංවීම සඳහා මෙවැනි තරගාවලි මගින් විශාල පිටුවහලක් ලැබෙන බවයි. දෙස් විදෙස් අවධානය දිනාගත් වෙළඳ සේවා ක්රිකට් පිටියේ දක්ෂයින් රැසක් බිහිවන මෙම තරගාවලිය, මෙවරත් ඉහළ ප්රමිතියකින් සහ තරගකාරීත්වයකින් යුතුව පවත්වන බව සංවිධායකයෝ වැඩිදුරටත් ප්රකාශ කළහ.
එම්.සී.ඒ ‘F’ කාණ්ඩයේ ක්රිකට් සටන ඇරඹෙයි: ෆෙයාර්ෆස්ට් රක්ෂණ සමාගම අනුග්රහයෙන් ශක්තිමත් වෙයි
