ශ්‍රී ලංකා රජය විසින් දෙවන ඒකාබද්ධ මාර්ග ආයෝජන වැඩසටහන (iRoad 2) – පස්වන අදියර යටතේ ආසියානු සංවර්ධන බැංකුව (ADB) සමඟ සාර්ථකව සාකච්ඡා අවසන් කර, ඇමරිකානු ඩොලර් මිලියන 90ක ණය මුදලක් බලමුළු ගන්වා ඇත. මෙම වැඩසටහන මගින් ග්‍රාමීය ප්‍රජාවන් සහ ප්‍රධාන සමාජ-ආර්ථික මධ්‍යස්ථාන අතර සම්බන්ධතාව වැඩි දියුණු කිරීම තුළින් මාර්ග ප්‍රවාහන කාර්යක්ෂමතාව ඉහළ නැංවීමටත්, ජාතික මාර්ග නියෝජිතායතනවල ආයතනික ධාරිතාව ශක්තිමත් කිරීමටත් අපේක්ෂා කෙරේ. මෙම ADB ණය ආධාරය, කිලෝමීටර 500ක පමණ ග්‍රාමීය ප්‍රවේශ මාර්ග, වැඩිහිටියන්, කාන්තාවන්, ළමුන් සහ ආබාධිත පුද්ගලයන් සඳහා ඇතුළත් වන පරිදි සියලු කාලගුණ තත්ත්වයන්ට ඔරොත්තු දෙන සහ දේශගුණයට ඔරොත්තු දෙන ප්‍රමිතීන්ට අනුව වැඩිදියුණු කිරීමට සහාය වනු ඇත. තවද, මෙම වැඩසටහන ජාතික මාර්ග කිලෝමීටර 21ක් ප්‍රතිසංස්කරණය කිරීමට සහ ග්‍රාමීය ප්‍රවේශ මාර්ග කිලෝමීටර 100ක් නඩත්තු කිරීමට පහසුකම් සපයනු ඇත. ක්‍රියාත්මක කිරීමේ නියෝජිතායතනය ලෙස මාර්ග සංවර්ධන අධිකාරිය (RDA) කටයුතු කරන අතර, විධායක නියෝජිතායතනය ලෙස ප්‍රවාහන, මහාමාර්ග සහ නාගරික සංවර්ධන අමාත්‍යාංශය කටයුතු කරනු ඇත. 2025 ඔක්තෝබර් 31 වන දින කොළඹ මහ භාණ්ඩාගාරයේදී මෙම ණය ගිවිසුම විධිමත් ලෙස අත්සන් කරන ලදී. ශ්‍රී ලංකා රජය වෙනුවෙන් මුදල්, සැලසුම් හා ආර්ථික සංවර්ධන අමාත්‍යාංශයේ ලේකම් ආචාර්ය හර්ෂණ සූරියප්පෙරුම මහතාත්, ආසියානු සංවර්ධන බැංකුව වෙනුවෙන් ADB ශ්‍රී ලංකා නේවාසික දූත මණ්ඩලයේ රට අධ්‍යක්ෂ ටකාෆුමි කඩොනෝ මහතාත් අත්සන් තැබූහ.
ග්‍රාමීය මාර්ග දියුණුවට ADB වෙතින් ඇ.ඩො. මිලියන 90ක ණය මුදලක්!
