ග්‍රීක බැඳුම්කර සිද්ධිය: කබ්රාල් ඇතුළු සිව්දෙනා නිදහස්

හිටපු මහ බැංකු අධිපති අජිත් නිවාඩ් කබ්රාල් මහතා ග්‍රීක බැඳුම්කර සිද්ධිය සම්බන්ධයෙන් කොන්දේසි සහිතව මුදා හැරීමටත්, සෙසු විත්තිකරුවන් තිදෙනා කොළඹ මහාධිකරණ විනිසුරු මොහොමඩ් මිහාල් මහතා විසින් කොන්දේසි විරහිතව මුදා හැරීමටත් ඊයේ (දෙසැම්බර් 10) නියෝග කරන ලදී. දැඩි ආර්ථික අර්බුදයක පැවති ග්‍රීසියේ, හිටපු මහ බැංකු නිලධාරීන් දැනුවත්ව එරට රජය විසින් නිකුත් කරන ලද භාණ්ඩාගාර බිල්පත් මිලදී ගැනීම හේතුවෙන් රජයට රුපියල් බිලියන 1.84 කට අධික අලාභයක් සිදු කළ බවට චෝදනා එල්ල විය. අල්ලස් හෝ දූෂණ චෝදනා විමර්ශනය කිරීමේ කොමිෂන් සභාව (CIABOC) විසින් කබ්රාල්, හිටපු නියෝජ්‍ය අධිපති ධර්මසේන ධීරසිංහ සහ සහකාර අධිපතිවරුන් වන දොන් වසන්ත ආනන්ද සිල්වා සහ එම්.ඒ. කරුණාරත්න යන අයට එරෙහිව මෙම නඩුව ගොනු කර තිබුණි. ශ්‍රී ලංකා මහ බැංකුවේ හිටපු අධිපති නිවාඩ් අජිත් ලෙස්ලි කබ්රාල් මහතා ඇතුළු පස් දෙනෙකුට එරෙහිව කොළඹ මහාධිකරණයට ගොනු කළ නඩුවේ, පළමු විත්තිකරු වන නිවාඩ් අජිත් ලෙස්ලි කබ්රාල් මහතාට එරෙහි අධිචෝදනා අල්ලස් පනතේ 67(1) වගන්තිය යටතේ ඉවත් කර ගැනීම සඳහා සලකා බැලුණි. මේ සම්බන්ධයෙන් පළමු විත්තිකරු කළ ඉල්ලීමක් අනුව, අල්ලස් හෝ දූෂණ චෝදනා විමර්ශනය කිරීමේ කොමිෂන් සභාවේ අනුමැතියෙන් පසු අල්ලස් පනතේ 67(2) වගන්තිය යටතේ අධ්‍යක්ෂ ජනරාල්වරයා විසින් කරුණු පරීක්ෂා කිරීමෙන් පසු, අල්ලස් පනතේ 67(3) වගන්තිය යටතේ පළමු විත්තිකරුට එරෙහි අධිචෝදනා අද දින ඉවත් කර ගන්නා ලදී.​කාරණා සලකා බැලීමෙන් පසු, අල්ලස් පනතේ 67 වගන්තියට අනුව කබ්රාල් මහතා කොන්දේසි සහිතව මුදා හැරීමට විනිසුරුවරයා නියෝග කළේය. සෙසු විත්තිකරුවන් තිදෙනා වන ධර්මසේන ධීරසිංහ, දොන් වසන්ත ආනන්ද සිල්වා සහ එම්.ඒ. කරුණාරත්න අපරාධ නඩු විධාන සංග්‍රහයේ 194(3) වගන්තිය යටතේ කොන්දේසි විරහිතව නිදහස් කරන ලදී. මෙම අධිචෝදනා ඉවත් කර ගැනීම සඳහා මහාධිකරණ විනිසුරුවරයා අවසර ලබා දුන්නේය. ඒ අනුව, පළමු විත්තිකරුට මාස තුනක කාලයක් තුළ ශ්‍රී ලංකා මහ බැංකුව විසින් ලබා දී ඇති ගිණුමට වන්දියක් ලෙස රුපියල් 1,843,267,595.65 ක මුදලක් ගෙවීමට සිදුවේ. නියමිත මාස තුනේ කාලය තුළ මෙම මුදල තැන්පත් කිරීමට අපොහොසත් වුවහොත්, අල්ලස් පනතේ 67(5) වගන්තිය යටතේ ඔහුට එරෙහිව ඇති අධිචෝදනා යළි ස්ථාපිත වනු ඇත. මීට පෙර, 2024 වසරේදී CIABOC විසින් එම විත්තිකරුවන්ට එරෙහිව කොළඹ මහාධිකරණය හමුවේ අධිචෝදනා ගොනු කර තිබුණි. විත්තිකරුවන් විසින් මතු කරන ලද මූලික විරෝධතා සලකා බැලීමෙන් පසු, අධිචෝදනාවලට අත්සන් තැබූ දිනය සම්බන්ධයෙන් CIABOC විසින් මතු කරන ලද තාක්ෂණික දෝෂයක් හේතුවෙන් 2024 මැයි 31 වන දින අධිචෝදනා භාර නොදී විත්තිකරුවන් මුදා හරින ලෙස මහාධිකරණය නියෝග කර තිබුණි. පසුව, CIABOC විසින් 2024 අගෝස්තු 21 දින විත්තිකරුවන්ට එරෙහිව නැවත නඩුව ගොනු කර ඇත.