හැටන්, මටුකැලේ රුවන්පුර ජනපදයේ පවුල් දෙකක් අතර ඇති වූ දරුණු ගැටුමකින් තිදරු පියෙකු අවාසනාවන්ත ලෙස මියගොස් තිබේ. මෙලෙස දිවි අහිමි වී ඇත්තේ එම වත්තේම පදිංචිව සිටි 39 හැවිරිදි පුද්ගලයෙකි.ප්රදේශයේ පවතින පානීය ජල නළ සම්බන්ධ ගැටලුවක් මුල් කරගනිමින් පසුගිය 24 වැනිදා සිට දෙපාර්ශවය අතර විටින් විට වාද විවාද හටගෙන ඇත. පසුව එම ආරවුල පාලනය කරගත නොහැකි මට්ටමට වර්ධනය වී ඇති අතර, අවසානයේ එය දරුණු පහරදීමකින් කෙළවර වී තිබේ.මෙම ගැටුමෙන් තුවාල ලැබූ පුද්ගලයන් හය දෙනෙකු රෝහල් ගත කළ අතර, ඉන් බරපතළ තත්ත්වයේ පසු වූ අයෙකු මහනුවර ශික්ෂණ රෝහලේ දැඩි සත්කාර ඒකකයට ඇතුළත් කෙරිණි. එහි ප්රතිකාර ලබමින් සිටියදී ඔහු මියගිය බව පොලීසිය තහවුරු කළේය.තුවාල ලැබූ අනෙක් පස් දෙනා මේ වන විට දික්ඔය මූලික රෝහලේ ප්රතිකාර ලබන අතර, එම පිරිස අතර මියගිය පුද්ගලයාගේ සොහොයුරා ද සිටින බව වාර්තා වේ. පවතින තත්ත්වය මත ප්රදේශයේ ආරක්ෂාව සම්බන්ධයෙන් ද අවධානය යොමුව ඇත.සිද්ධිය සම්බන්ධයෙන් පරීක්ෂණ පැවැත්වූ පොලීසිය සැකකරුවන් තිදෙනෙකු ඊයේ (27) අත්අඩංගුවට ගෙන තිබේ. ඔවුන් හැටන් මහේස්ත්රාත් අධිකරණය හමුවට ඉදිරිපත් කිරීමෙන් අනතුරුව ලබන මාර්තු මස 10 වනදා දක්වා රක්ෂිත බන්ධනාගාර ගත කිරීමට නියෝග කෙරිණි.සුළු ආරවුලක් මාරාන්තික ගැටුමක් දක්වා පරිවර්තනය වීම පිළිබඳව වතු ජනපදයේ වැසියන් දැඩි කම්පනයට පත්ව සිටිති. හැටන් පොලීසිය සිද්ධිය සම්බන්ධයෙන් වැඩිදුර විමර්ශන මෙහෙයවනු ලබයි.
ජල ප්රශ්නයක් දුරදිග ගොස් හැටන්හිදී තිදරු පියෙකු ජීවිතක්ෂයට
