6 වන ශ්රේණිය සඳහා නිකුත් කරන ලද ඉංග්රීසි අතිරේක ඉගෙනුම් මොඩියුලයේ අන්තර්ගත වූ මතභේදාත්මක වෙබ් අඩවි යොමුවක් සම්බන්ධයෙන් පරීක්ෂණ නිමවන තෙක් ජාතික අධ්යාපන ආයතනයේ (NIE) අධ්යක්ෂ ජනරාල් මහාචාර්ය මංජුලා විතානපතිරණ මහත්මිය සිය ධුරයෙන් තාවකාලිකව ඉල්ලා අස්වීමට තීරණය කර ඇත. ජාතික අධ්යාපන ආයතනය විසින් සකස් කරන ලද මෙම ඉගෙනුම් ද්රව්යවල නුසුදුසු වෙබ් අඩවි යොමුවක් (Web reference) ඇතුළත් වීම සම්බන්ධයෙන් ස්වාධීන පරීක්ෂණයක් පැවැත්වීමට පහසුකම් සැලසීම සඳහා මෙම පියවර ගත් බව අධ්යාපන අංශ ආරංචි මාර්ග සඳහන් කරයි. බලධාරීන් විසින් සිදු කරන ලද පසු විපරම් වලදී තහවුරු වී ඇත්තේ අදාළ වැරදි යොමුව මගින් සමලිංගික ප්රජාව ඉලක්ක කරගත් වෙබ් අඩවියකට පරිශීලකයින් යොමු වන බවයි.මෙම සිද්ධිය සම්බන්ධයෙන් අධ්යාපන අමාත්යාංශය වහාම අභ්යන්තර පරීක්ෂණයක් ආරම්භ කර ඇති අතර, සිද්ධිය පිළිබඳ වැඩිදුර විමර්ශනයක් සඳහා අපරාධ පරීක්ෂණ දෙපාර්තමේන්තුවට (CID) පැමිණිල්ලක් ද ඉදිරිපත් කර ඇත. මීට අමතරව, 6 වන ශ්රේණිය සඳහා මුද්රණය කරන ලද අදාළ ඉංග්රීසි මොඩියුලය බෙදා හැරීම අත්හිටුවීමට ද අමාත්යාංශය කටයුතු කර තිබේ. ඉදිරියේදී විෂයමාලා සංවර්ධනය කිරීමේදී මෙවැනි සිදුවීම් වැළැක්වීම සඳහා පරීක්ෂණ වාර්තාවල සොයාගැනීම් මත පදනම්ව අවශ්ය නිවැරදි කිරීමේ පියවර ගන්නා බව අධ්යාපන බලධාරීන් වැඩිදුරටත් ප්රකාශ කර ඇත.
ජාතික අධ්යාපන ආයතනයේ අධ්යක්ෂ ජනරාල් ධුරයෙන් තාවකාලිකව ඉවත්වෙයි!
