රට පුරා පිහිටි බොහෝ මාතෘ හා ළමා රෝහල්වල දැඩි ත්රිපෝෂ හිඟයක් වාර්තා වන බව වෛද්ය හා සිවිල් අයිතිවාසිකම් වෘත්තීය සමිති සම්මේලනයේ සභාපති වෛද්ය චමල් සංජීව මහතා පැවසීය. මෙම හිඟය හේතුවෙන්, දැනට ත්රිපෝෂ ලබා දෙන්නේ දැඩි මන්දපෝෂණයෙන් පෙළෙන අවුරුදු තුනට වැඩි දරුවන්ට මෙන්ම, යකඩ ඌනතාවයෙන් පෙළෙන මව්වරුන්ට සහ බර අඩු ගර්භනී කාන්තාවන්ට පමණක් බව ඔහු සඳහන් කළේය. වසර කිහිපයක සිට අවුරුදු තුනට අඩු දරුවන්ට ත්රිපෝෂ ලබා දී නොමැති බව වෛද්ය සංජීව මහතා පෙන්වා දුන්නේය. මෙම වැඩසටහන නැවත ආරම්භ කරන බවට බලධාරීන් නිවේදනය කළද, රජය මෙතෙක් එය ක්රියාත්මක කිරීමට අපොහොසත් වී ඇතැයි ඔහු කීය. තවදුරටත් අදහස් දැක්වූ ඔහු, මීට පෙර සෞඛ්ය අමාත්යාංශය යටතේ තිබූ ත්රිපෝෂ සමාගම, විශේෂ නිවේදනයක් මගින් මෑතකදී වෙළඳ අමාත්ය වසන්ත සමරසිංහ මහතා යටතේ ඇති වෙළඳ අමාත්යාංශය වෙත පවරා ඇති බව පෙන්වා දුන්නේය. ත්රිපෝෂ සමාගම විකිණීමට කුමන්ත්රණයක් ඇති බවට සෞඛ්ය වෘත්තීය සමිති මෑතකදී චෝදනා කළ අතර, ත්රිපෝෂ සමාගම සෞඛ්ය අමාත්යාංශයෙන් ඉවත් කර වෙළඳ අමාත්යාංශය යටතේ තැබීමට හේතු වූ පදනම රජය විසින් පැහැදිලි කළ යුතු බව වෛද්ය සංජීව මහතා අවධාරණය කළේය.
ත්රිපෝෂ හිඟයක්: අදාළ සමාගම සෞඛ්ය අමාත්යාංශයෙන් ඉවත් කිරීම ගැන ප්රශ්න
