​තේ කර්මාන්තයේ දැවැන්ත පිම්මක්: “පිවිතුරු තේ ගම්මාන 500” සමඟින් ඩොලර් බිලියන 2.5ක ඉලක්කයක්!

​ශ්‍රී ලංකාවේ තේ නිෂ්පාදනය නව මාවතකට යොමු කරමින් “පිවිතුරු තේ ගම්මාන 500” උපායමාර්ගික ව්‍යාපෘතිය පසුගියදා බත්තරමුල්ල “අපේ ගම” පරිශ්‍රයේදී නිල වශයෙන් ආරම්භ විය. වැවිලි සහ ප්‍රජා යටිතල පහසුකම් අමාත්‍යාංශය යටතේ ක්‍රියාත්මක වන කුඩා තේ වතු සංවර්ධන අධිකාරිය විසින් මෙය සංවිධානය කර තිබුණි. 2030 වසර වන විට මෙරට තේ නිෂ්පාදනය කිලෝග්‍රෑම් මිලියන 400 දක්වා ඉහළ නැංවීමත්, එමඟින් ඇමරිකානු ඩොලර් බිලියන 2.5ක වාර්ෂික අපනයන ආදායමක් උපයා ගැනීමත් මෙම වැඩසටහනේ ප්‍රධාන ඉලක්කය වී තිබේ.​මෙහි ප්‍රධාන ආරාධිතයා ලෙස එක්වූ වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා සඳහන් කළේ, මෙය හුදෙක් ව්‍යාපෘතියක් නොව මෙරට තේ කර්මාන්තයේ සැබෑ පුනරුදයක ආරම්භය බවයි. “පොහොසත් රටක් – ලස්සන හෙටක්” යන රජයේ ප්‍රතිපත්තිමය දැක්මට සමගාමීව මෙම සැලසුම් ක්‍රියාත්මක වන බව ඔහු පැවසීය. ලෝක දේශපාලනික අර්බුද සහ යුදමය තත්ත්වයන් හමුවේ වුවද, ජනාධිපතිවරයාගේ මඟපෙන්වීම යටතේ මෙරට ආර්ථිකය ශක්තිමත් කිරීමට ඇති අභියෝග ජය ගැනීමට රජය සූදානම් බව අමාත්‍යවරයා මෙහිදී අවධාරණය කළේය.​තම අතීතය සිහිපත් කරමින් අමාත්‍යවරයා සංවේදී අදහසක් ද පළ කළේය. “මම හිටියෙත් මැටි ගෙදරක. ඒ නිසා ගොවියාගේ හැඟීම් මට හොඳින් තේරෙනවා. අද ලෝකය ගොඩක් දියුණුයි, අපේ තේ කර්මාන්තයත් ඒ දියුණුව කරා රැගෙන යා යුතුයි,” යනුවෙන් ඔහු පැවසීය. ඕනෑම කාර්යයක් සාර්ථක වන්නේ එහි ප්‍රතිඵල ගමට දැනෙන විට බවත්, ඒ නිසාම නිලධාරීන් කඩදාසිවලට පමණක් සීමා නොවී ගොවියාගේ ජීවන තත්ත්වය උසස් කිරීම වෙනුවෙන් කැපවිය යුතු බවත් අමාත්‍යවරයා පෙන්වා දුන්නේය.​මෙම ව්‍යාපෘතිය යටතේ “Ceylon Tea” සන්නාමය ගම්මාන 500ක් පුරා ව්‍යාප්ත කිරීමට සැලසුම් කර ඇති අතර, එය සංචාරක කර්මාන්තය සමඟ ද බද්ධ කිරීමට නියමිතය. විශේෂයෙන්ම බණ්ඩාරවෙල සහ ඇල්ල වැනි ප්‍රදේශවල පවතින නව සංචාරක ප්‍රවණතා තේ කර්මාන්තය ප්‍රවර්ධනය කිරීමට යොදාගත හැකි බව අමාත්‍යවරයා සඳහන් කළේය. ක්‍රිකට් ක්‍රීඩාව වැනි අනෙකුත් ක්ෂේත්‍රවල පසුබෑමක් දක්නට ලැබුණද, තේ කර්මාන්තය හරහා රටට ජයග්‍රහණ අත්කර දීමට තවමත් විශාල විභවයක් පවතින බව ඔහුගේ අදහස විය.​වැඩමුළුව අවසන් කරමින් අමාත්‍යවරයා පැවසුවේ, “මොන දේ කළත් හරි යන්නේ නැහැ” කියා පරාජිත මානසිකත්වයෙන් සිටින පිරිසට නව බලාපොරොත්තුවක් ලබාදීම මෙම වැඩසටහනේ අරමුණ බවයි. දේශීය ගොවියා ශක්තිමත් කරමින්, නව තාක්ෂණය සහ උපායමාර්ගික සැලසුම් ඔස්සේ ශ්‍රී ලංකාව යළිත් ලෝකයේ ප්‍රමුඛතම තේ නිෂ්පාදකයා බවට පත්කිරීමේ “සිහිනය” සැබෑ කර ගැනීමට සියලු දෙනා එක්විය යුතු බව ඔහු වැඩිදුරටත් ඉල්ලා සිටියේය.